牛舌迷注意！今次精選4間必試嘅牛舌專門店，每間餐廳都有其獨特風味，帶你探索牛舌嘅多元滋味，睇吓邊間啱心水！
招牌極上牛舌定食 Gyutan Toku牛舌專門店
圖：呢間細細間嘅小店，裝潢走日本風，而主打極上牛舌定食用上最靚嘅牛舌芯，仲可以選擇唔同分量！一倍有五塊厚切牛舌，鮮紅油光閃閃，賣相已經好吸引，牛舌口感軟淋彈牙，仲帶濃郁油香，配埋鮮磨wasabi同檸檬，隨自己口味調配唔同風味。另外泡菜牛舌定食都值得一試，牛舌切條狀，配合酸辣嘅泡菜味道好開胃；紅酒汁煮牛舌定食一端上嚟已經聞到濃濃嘅紅酒香氣，黏稠濃郁嘅紅酒汁完美滲入每片牛舌，入口即化但又唔膩。
芫荽蒜蓉味牛舌 燒肉 JuJu
圖：一人主題日式燒肉店，芫荽蒜蓉味牛舌係招牌菜單，有150g或300g選擇，薄切牛舌口感爽脆彈牙，加上香濃嘅芫荽蒜蓉醬，芫荽味同牛舌嘅濃郁肉香互相融合，啲香味真係不得了！套餐仲包埋飯、味噌湯同泡菜，推薦加錢升級成日本蛋紫菜飯，用生蛋黃同珍珠米飯配燒肉係一大享受。牛舌除咗芫荽蒜蓉味，仲有松露蒜蓉、洋蔥蒜蓉同辣椒蒜蓉味揀～
元朗人氣燒肉店 摩登牛舌燒肉專門店
圖：元朗呢間燒肉店絕對係牛舌控嘅天堂！平時燒肉見到嘅都係切片，但呢度嘅牛舌係成條上，佢哋最招牌嘅長龍牛舌足足有50cm長，成條牛舌擺上枱時超震撼，絕對係「脷搭脷」嘅真實體驗！呢款長龍牛舌爽口彈牙，燒到微焦後淋上黑椒玫瑰鹽、蒜蓉同蔥粒，入口更加濃郁惹味！而「長龍牛舌9款套餐」除咗超長牛舌，仲配上豚五花、雪花肉、雞腿肉、牛肋條等多款燒肉，價錢合理，性價比高，啱哂想試多款燒肉嘅朋友。
觀塘區牛舌專門店 舌丼 
圖：yoyo454
唔少觀塘區附近返工嘅朋友都推薦嘅牛舌專門店！主打嘅牛舌料理分為丼飯同鐵板系列，每款牛舌定食都可以自由選擇配料，例如雞扒、鰻魚、大虎蝦、杏鮑菇等，配搭選擇靈活多變。每個定食仲包埋沙律、前菜、紫菜飯同熱辣辣嘅味噌湯，非常飽肚！牛舌芯係定食嘅主角，嫩滑彈牙，牛味濃郁，配搭和風鹽蔥汁或日式牛排汁令牛舌更加鮮香。
文：Yanica
編：Cathy
