香港人對食要求高就大家都知，咁講到意粉梗係一定要食手工意粉啦～手工意粉每日新鮮製造，口感會較煙韌，蛋味亦濃郁啲，一齊睇吓香港有邊間手工意粉好食。

避風塘炒蟹意粉 Fini’s  

圖：SandyWon

一間結合美式風格同意大利傳統嘅餐廳，以其手工意大利麵同創新菜式聞名，特點係將意大利嘅手工製作技巧同本地口味融合，為食客提供獨特而富有層次感嘅意大利麵。招牌菜Typhoon Shelter Crab Linguini將本地風味嘅避風塘炒蟹加入意大利麵，帶出濃郁嘅蒜香同鮮味。另外Mafaldine Bolognese同Tagliatelle with Truffled Shrimp and Lobster亦值得一試，前者肉醬味道濃厚，後者帶有龍蝦同松露嘅鮮美，令人一試難忘。

自製龍蝦汁蟹肉手工寬麵條 Vol.1 Cafe

圖：hk_holidaydiary

位於銅鑼灣嘅樓上小店，主打西式小食、手工意粉、甜品同特飲等，質素都幾好～每一碟手工意粉都係新鮮製作，確保麵條嘅彈牙同質感，而意粉偏向粗身，啱晒鍾意有咬口嘅朋友。自製龍蝦汁蟹肉手工寬麵條，龍蝦汁香濃鮮甜，麵條係厚身嗰種，每一條都掛上滿滿龍蝦汁，仲有啖啖蟹肉好足料。

上環意式小餐館 Posso  

圖：Kwaiowo

由網店起家嘅手工意粉店，用100%意大利麵粉製作，亦會因應製作唔同口感嘅意粉而選用00麵粉或粗粒小麥粉，加上走地雞蛋令意粉顏色較為鮮艷同蛋味香濃。Calla配料有辣肉腸、鮮魷魚同蜆，排成花花形狀擺盤好靚，意粉口感Q彈，味道微辣幾開胃；Agnolotti就係薄薄嘅雲吞皮包裹住餡料，有意式肉腸、墨西哥辣椒同雞皮脆粒，蘸滿濃郁醬汁，啱晒同朋友分享。

米芝蓮推介手工意粉 Involtini Italian Cuisine

圖：likepinkyland

已經連續八屆獲得米芝蓮推介嘅意大利菜，專注於用最優質嘅意大利進口食材，同時堅持傳統手工製作，現場有開放式廚房可以觀賞烹調過程～招牌Handmade Tagliolini with Carabineros Red Prawn，選用西班牙紅蝦，煎紅蝦時會將蝦膏加入煮意粉嘅海鮮湯，蝦味超濃烈，令意粉吸晒蝦嘅精華。

招牌卡邦尼意粉 Ask For Alonzo

圖：chiuwing123456789

由意大利人Alonzo創辦兼主理嘅意式小餐館，氛圍輕鬆休閒。意大利麵以當地傳統手法製作，招牌卡邦尼意粉選用意大利頂級小麥意粉，配上Alonzo親自到意大利選購嘅羅馬醃豬頰肉（guanciale pork）所製成嘅煙肉碎，口感香脆，味道鹹香；每條麵條都掛滿醬汁， 啖啖都好滿足。另外白酒蜆肉意粉都唔錯，入口少少辣又充滿鮮味。

文：Yanica
編：Cathy