濃郁嘅湯頭配上金邊粉，以船麵作為主打嘅餐廳愈來愈多。由經濟實惠到豪華版嘅都有，亦有餐廳跟足傳統供應細碗船麵，今期嚴選咗5間畀大家，間間都有特色，有興趣就快啲Bookmark啦！

目錄

頂級安格斯牛肉船麵 泰濃麵

圖: 肥dodo

一間幾出名、質素又有保證嘅船麵店，湯底用咗超過20種材料加豬骨長時間熬成，濃得嚟飲落去好舒服，入口會感受到微微藥材味，好香好醇。佢嘅船麵可以配唔同配料，豪華啲有原隻波士頓龍蝦同A5黑毛和牛，比較多人食就有頂級安格斯牛肉船麵，牛肉半生熟啱啱好。想鮮味啲可以揀卜卜蜆，湯底會多一份鮮味。

葵涌隱蔽小店 Aroydee thai 船麵

圖: 025micheel

呢間船麵小店位於葵涌一條巷仔內，由泰國人主理，裝修溫馨舒適，好似去咗泰國人屋企食飯咁，好有風味～船麵可以自選配料同粉麵，湯底香濃惹味，而且份量又多，五十令蚊一碗性價比真係好高，配料幾推介雞絲同豬扒，前者索晒啲湯；後者有預先烤過好香口。如果唔想揀可以直接叫佢哋嘅特色遊船河，配料有豬肉片、豬肉丸同炸豬皮，香脆嘅炸豬皮浸湯食好正呀。

泰國文青Cafe 不苦 

圖: vvv.foodies

以淺木色作主調，日系中又夾雜住一點港式復古風味，就咁睇係咪以為係日系Cafe呢～但其實呢間文青Cafe主打泰國菜，啱晒想chill下又想食泰菜嘅朋友。招牌泰北風味船麵用豬骨湯配搭多種香料熬煮10小時，湯頭濃郁惹味，食到一絲絲香料嘅微辣感。選用泰國正宗船麵條，質地順滑特別掛湯～

炭烤肉眼牛丸船麵 東羅泰館  

圖: yoyo454

有半戶外座位嘅泰國餐廳，融合西式煮法，走泰國fusion菜路線～炭烤肉眼牛丸船麵湯底充滿正宗泰式風味，湯底比較清澈但都好香。配料就比一船麵更豐富，有炭烤肉眼、牛丸、菜同白蘿蔔，好足料！肉眼肉質軟嫩，有陣陣炭烤風味，牛丸多汁彈牙，牛味突出。

傳統泰北細船麵 湄南.河泰式船麵 

圖: cojicoji8898

每次去泰國都最鍾意去食細細碗嘅船麵，貪佢細細碗可以食唔同配料同口味呀！荃灣呢間餐廳一樣有供應呢啲細碗船麵，自家熬製多款湯底及調配獨家醬汁，可以食到正宗泰式風味。一份船麵套餐有3碗細船麵，可自選湯底、配料同麵底，傳統款船湯湯底藥材料味突出，另外仲有清湯、冬蔭公同麻辣湯揀！

文: Yanica