香港6間打卡酒吧浪漫星空/異國風情/蝴蝶世界

無論係同另一半拍拖，定同閨蜜一齊，收工或者放假想去酒吧飲杯Cocktail，一邊傾計一邊享受微醺之夜，有得打埋卡兼呃Like就最好不過？當然無問題！開飯仔今次精選六間打卡酒吧，有唔同主題或者概念，由裝修到調酒各具特色，從夢幻到熱帶風情都有得揀。

浪漫星空天幕 Starò

尖沙咀諾士佛臺今年五月新開嘅樓上酒吧餐廳，一入去就會見到好靚嘅半球形星空卡座，再加上星球燈飾、紫色月亮等同星空天幕等，成個Feel真係好浪漫唯美。餐廳主打歐陸菜，包括西西里紅蝦手工幼蛋麵、意式燒乳豬配焦糖蘋果芥末籽蓉、焗法國黃油雞等。

呢間人氣酒吧餐廳樓高兩層，室內以藍白色地中海風設計為主，有熱氣球、浴缸等打卡位；望到維港嘅天台裝修走粉紅色度假風路線，放滿藤椅、乾花等。不時更會舉辦Band Night Show或者DJ Party，想Chill返晚無難度。

旺角呢間樓上酒吧喺疫情期間開設，當時為咗畀大家有出國旅行Feel，餐廳裝修走中東、摩洛哥風格，室內有水池同真沙沙灘！室外裝修就以粉紅色為主再加藤椅同稻草遮，點打卡都得。食物有多國菜選擇，Cocktail亦有各種創意同經典款式。

中環有唔少酒吧，當中就以呢間位於大館、由著名室內設計師Ashley Sutton親自操刀嘅蜻蜓主題酒吧最多人去打卡。無他嘅，綠松石玻璃燈天花板真係好搶鏡。加上裝修以19世紀歐洲新藝術風格為主，非常精緻華麗，Cocktail同小食一樣都有水準。

同樣位於中環、室內設計同樣出自Ashley Sutton之手，唔同嘅係呢間酒吧以童話《鐵仙子》為概念，天花懸掛約萬隻手工蝴蝶標本！亦有供應靈感源自《鐵仙子》嘅Cocktail，包括味道酸甜易入口嘅Midnight Butterfly，清爽怡人嘅Fairy's Secret等。

上到嚟呢間酒吧好似去咗熱帶島嶼咁好好Feel，據聞仲有機會遇到明星？皆因酒吧由演員胡杏兒嘅老公Philip Lee開設，主打香港較為少見嘅Tiki調酒。Tiki調酒多以冧酒為基底，配搭唔同嘅熱帶水果。用埋圖騰雕像杯，精神已經飛咗去島國度假啦！

文：Cathy.H