P助同兔兔係好多人嘅新寵，夠cute cute 嘛。正當粉絲慨嘆去唔到東京之前開落嘅pop up店嗰陣，香港有間甜品店就為大家帶嚟好消息！佢哋有聯乘活動，主題pop up 甜品店呀！

舖頭唔係好大，但今次嘅產品都算幾多呀，而且幾靚。呢間甜品店一向都同唔同嘅卡通人物做crossover，做出好多款瑞士卷蛋糕同馬卡龍，嚟到P助與兔兔做主角，當然都佔一席位啦。印有P助與兔兔喺面嘅瑞士卷蛋糕，係夏天大熱嘅白桃味嚟，有原條裝亦有散裝賣。

而馬卡龍一盒八粒，同樣都係印晒佢哋個樣上去㗎，粒粒唔同樣唔同味，分別有朱古力、熱情果、芒果、黑加侖子、Earl Grey、綠茶等味，另外插支棍，就變咗波板糖造型，超得意。

同場仲有造型冬甩、cupcake、泡芙連馬卡龍杯，真‧粉絲應該會全部都想要。

但講到最吸引，應該一定係雪糕同雪條！甜甜地，淡淡桃香嘅日本直送白桃味軟雪糕，可以揀甜筒或者杯裝，識揀一定揀杯裝，因為隻杯都係P助同兔兔嚟呀，食完鍾意嘅有得留低！但留意返，淨係得馬鞍山分店先有雪糕食咋。

至於雪條就仲cute，成隻兔兔頭咁樣，都係白桃味嚟嘅，不過就加埋yogurt，感覺比較light，多咗啲啲酸味，冇咁甜。但想食雪條嘅朋友仔就要等下喇，7月26號先開始供應呀。

舖頭另外仲有靚靚P助同兔兔嘅陶瓷碟、陶瓷杯等等精品賣呀，不過暫時只係接受預訂。

山下菓子
荃灣分店、馬鞍山分店、將軍澳分店
期間限定：即日 至8月31日

文、相、片：Kar