鍾意食和牛嘅朋友有福了，日本薩摩和牛名店Beefar’s已經喺尖沙咀開業！呢間燒肉店喺大阪及鹿兒島有7間分店，專門引入鹿兒島薩摩和牛，全部達A4級或以上，而鹿兒島和牛於《全國和牛能力共進會》稱為日本一，級數No.1就知有幾靚啦！
Beefar’s母公司為鹿兒島最大和牛生產商，薩摩牛由鹿兒島唔同自家農場供應，直接空運來港，餐廳更會寫明飼養員及農場，來源地及資料好清晰。每年生產13,000隻當中4%嘅頂級和牛，為A5等級而且BMS霜降程度達10級以上嘅「4%奇跡之牛」，香港都有得食！
4%奇跡之牛極上牛肩肉，油花雪白而且雲石紋好清楚，分佈平均，色澤帶粉紅，見到都想食呀！只需輕燒兩邊表面就食得，入口油花爆瀉，油脂甘香，肉質亦好嫩滑，和牛迷一定要試。
4%奇跡之牛極上牛肩肉 $238
另外必試牛之藏和牛盛合，全部都係薩摩和牛，可以一次過試晒極上牛肋肉、特上牛肋肉同普通牛肋肉嘅分別。另有薩摩牛牛後腿肉薄切，只輕炙一面即可，壽喜燒食法配上生雞蛋及酸汁一齊食，入口好軟滑。想試真牛肉味，就可以試赤肉，因脂肪量少冇咁油膩，肉味就較濃。
牛之藏和牛盛合 $988 （四人用）、$538 （二人用）
薩摩牛牛後腿肉 （薄切）
薩摩牛特上牛肋肉、薩摩牛上等牛肋肉
是日精選牛扒（當日為牛柳粒）、薩摩牛牛赤肉
而Beefar’s 全牛盛合就有齊薩摩和牛及美國Prime級牛肉嘅拼盤，試匀薩摩牛特上牛柳扒、薩摩牛特上牛肋肉、薩摩牛牛赤肉、西冷、牛小排、牛舌和牛面頰肉及安格斯側腹橫肌牛肉，比較吓唔同牛肉同部位嘅味道。
Beefar’s 全牛盛合 $848 （四人用）
日籍師傅暫時駐場控制品質，教路日本人會先食牛舌，快速炙熟加檸檬汁食，開胃之後可以品嘗油花重嘅牛肉，配燒肉汁、酸汁，甚至加鹽或青芥辣亦得。
其他食物仲有和牛海膽壽司及和牛甜梨卷、炸薩摩魚餅及極上牛肉湯飯等，開飯仔覺得和牛甜梨卷最好食，梨絲多汁，配生牛肉好夾。
和牛海膽壽司及和牛甜梨卷 $118
極上牛肉湯飯 $58
炸薩摩魚餅 $48
午市及晚市都有定食套餐，價錢唔算貴，鍾意食燒肉或者和牛可以嚟試！
地址：九龍尖沙咀金馬倫道8號康境酒店2樓
文、相、片：Perrins
