就快年尾，大家今個月食咗咩餐廳呀？天氣反映食慾，涼風陣陣最好就梗係食啲暖身嘢，火鍋呀麻辣呀就係首選，甚至係湯底熱辣辣嘅拉麵，都係唔錯嘅選擇。廢話少講即刻同大家睇睇今個月嘅好評十大先！
第10位 La Casa Bistro (*新上榜)
呢間西餐廳本來做意大利私房菜，十月新開地舖，舖頭細細，但至少貼地啲吖嘛。主打手製意粉，有幼蛋麵、闊條麵同野菌或芝士菠菜意大利雲吞，配自家製醬汁，仲可以揀意大利雜菜湯、牛腩蕃茄濃湯甚至泰式冬蔭功海鮮湯變做湯意，幾有新意呀。
圖：第9位 輝哥私房菜 (*新上榜)
打邊爐最緊要就係用料新鮮，呢一間用料都好唔錯，吸引唔少明星嚟幫襯。鍋底選擇豐富，好似蕃茄野菌龍蝦花甲、胡椒豬肚花甲、杏汁豬肺等12款，食物都係傳統為主，安格斯牛頸脊雪花平均，海鮮亦好新鮮。得五張枱同VIP房架咋，一定要訂位先食到！
圖：第8位 2DP
好慶幸素食呢個潮流仍然長青，呢間主打素食嘅café，來到11月仍然喺榜中，稍稍回落三級。咁凍仲食茶味雪糕？仲有其他甜品半熟芝士燉蛋、桃膠雪蓮佐黃耳都好滋潤架。鹹食的話就推介韓式泡菜芝士漢堡配蕃薯條同黑松露雜菌闊條蛋麵，素食都唔一定係淡而無味嘅！
圖：第7位 餃餃餃子 (*新上榜)
呢間來自日本嘅餃子店已經開咗一段時間，之前興濃湯水餃，今次就輪到日式餃子！餃子每日新鮮包製，皮薄而且煎我香脆仲不時推出新口味，好似京都九条葱餃子、蘑菇餃子及日本淡路島產洋餃子等，仲有shake shake同拉芝雞肉餃子添。
圖：第6位 湘蜀人家
食麻辣嘅四川菜館好多，但好味嘅又真係唔多。呢一間由四川師傅主理，有湖南及四川菜式，招牌菜有水煮魚，辣度夠而且好香，唔會一味死辣，而且份量十足。自家製四川涼粉好滑溜，酸香開胃。餐廳位於商場入面，企理乾淨，坐得舒服。
圖：第5位 火鍋英雄
連續幾位十月都有上榜，因為又係麻辣又係火鍋，係好難抗拒嘅！其實都有唔辣嘅湯底，好似二十五年陳年花雕醉烏雞鍋，用較健康嘅烏雞，酒味濃郁。酸菜冷鍋魚就帶酸香，加埋魚片更富鮮味。其他川式小菜好似係水煮魚、刴椒魚頭都唔好錯過呀。
圖：第4位 翟道翟棉棉冰
天氣凍都無阻食冰嘅決心！主打泰式芒果糯米飯刨冰嘅專門店，人氣繼續高企，只係微跌一級啫！除咗刨冰，飲品都係店子主打，香甜嘅泰式奶茶同貓山王奶昔固然多人like，其實冬蔭功梳打都幾得意，入口香辣有香茅味，好似凍同有汽版嘅冬蔭功湯！下次試試佢吖。
圖：Priscilla Chan、eat_eat_everyday
第3位 三家村水產 (*新上榜)
食海鮮唔係一定要去西貢，去油塘都得！呢間新開冇耐嘅海鮮浜燒店，一室日式魚市場格局，好似去咗日本咁！對住無敵海景，燒嘅就以日式海鮮為主，好似有帆立貝、生蠔、白蜆、蝦、蟹，亦有本地螺、火箭魷及自家風乾嘅一夜干，即揀即燒，唔使加任何調味都夠晒fresh！
圖：第2位 有囍 (*新上榜)
呢間星馬小店，有一道火焰胡椒蟹煲洗晒版，蟹斤量十足而且沾滿胡椒醬汁，仲會喺客人面前點火！其他菜式好似係奶油蝦、娘惹石蠔、藥膳花膠肉骨茶等都好多人食。店子亦有星馬火鍋，湯底有喇沙、鹹菜豬肚湯同肉骨茶，夠晒特色啦！
圖：第1位 魂 (*新上榜)
呢間店突然新上榜，就好似舊人攞新人獎咁。一早於鵝頸橋底打響名堂，當年曾經係濃厚豚骨湯拉麵嘅先頭部隊，今次於太子回歸，就立即登上No. 1寶座！難得維持原有餐牌，招牌魂拉麵、加入蟹膏金箔嘅太極、菠菜汁湯底青龍，仲有嗰隻極銷魂嘅溏心蛋，忠於原著，抵你排第一！
圖：文：Perrins
