嚟到2022年最後一個月，大家似乎都傾向要食好啲，燒肉、居酒屋、靚裝法國菜等統統上榜，有別於過往幾個月由地方小店佔多數嘅局面。
第10位 牛站（駅）麻辣火鍋放題（*新上榜） 
圖：觀塘新開冇耐嘅麻辣火鍋放題，選擇多多價錢又抵，200零蚊已經可任食120分鐘，仲有美國SRF牛肩胛肉眼同埋澳洲M5和牛，迅速吸引咗唔少火鍋控去朝聖。自助區嘅小食同甜品都好有誠意，連羽衣甘藍、麻辣小龍蝦、醉豬手，甚至三色芋圓同軟雪糕等都有。鍋底梗係要揀麻辣，香料味重，想要多個清清地平衡下嘅，推介滋潤雪梨蘋果豬骨鍋。
第9位 上村牧場（*新上榜） 
圖：搵食L* 、Foodopiahk
呢間日本品牌燒肉店，係日本嘅人氣店，開到過嚟香港當然繼續保持強勁氣勢，由特急列車運送嘢食到枱。主打鹿兒島自家牧場嘅薩摩牛，和牛五花嘅油脂最勁最香，和牛里肌則較有口感，特別少少嘅仲有棉花糖壽喜燒，食落甜甜地。除咗燒肉外，同時亦有壽司同拉麵等供應。
第8位 和藏（*新上榜）
圖：位於上環嘅日式居酒屋，走高貴型格路線，餐單設計亦見心思，除咗有龍蝦兩食、和牛三食外，就連卡邦尼都落重本，係五卵卡邦尼！集齊海膽、明太子、烏魚子、三文魚子同雞蛋於一身，吸睛得嚟味道又豐富。另外，酒鬼們唔好錯過呢度嘅清酒SET，一次過可以試到4款唔同果香同濃烈度嘅清酒，做埋food pairing都仲得。
第7位 本場
圖：上月第9位嘅日式燒肉放題能夠繼續守住10強，其中主要原因之一係放題最關鍵嘅上菜速度同埋準繩度，呢度都係廣得好評。4款燒肉放題套餐包括厚切豚肉、牛肩胛、極上牛小排海鮮同埋頂級澳洲和牛海鮮，有過百款食物選擇，牛小排油香十足，封門柳juicy多汁，牛舌配埋岩鹽就更加香口。最尾仲要有movenpick雪糕，絕對係滿足感MAX！
第6位 啖啖燕窩
圖：冬天要滋潤啲，觀塘主打燕窩同其他養生甜品嘅燉品店，坐享天時之利，再度打入十強。招牌椰汁燉桃膠、蜂蜜3.6牛奶木瓜燉雪燕等都係滋潤之選。另外可以試下燉花膠奶凍呢個配搭，都幾夾架，陣陣奶香，口感爽滑。除咗滋潤養生嘅甜品，同時又有刺激嘅麻辣魷魚等小食，滿足埋間中想放肆一下嘅心。
第5位 新沙洞大排檔（*新上榜）
圖：大角咀呢間韓國菜餐廳，係長沙灣新沙洞澡堂嘅姐妹店，同樣都花咗唔少心思喺裝修度。大角咀呢邊直情係神還原咗韓國巴士同地鐵站，打卡係必須的。食物方面，除咗招牌韓式炸雞外，記得要試埋醬油拼盤，有齊醬油蟹同醬油蝦，蟹膏鮮甜、蝦肉爽口，精髓係醬汁要嚟撈飯食，好入味架。
第4位 臺北棧（*新上榜）
圖：去到呢間新派台菜，招牌牛肉麵就當然要試啦，但建議可以多試一兩款小食，因為款款都充滿心思同設計。例如以蛋餅為例，居然有款皮蛋肉鬆蛋餅，蛋皮煙靭，食落啖啖都有皮蛋，好鬼足料。仲有幾乎枱枱都會點嘅手工鳳梨酥麻糬蛋撻，三層分別係又滑又甜嘅蛋撻、煙煙韌韌嘅麻糬同香甜嘅鳳梨酥，層次極之豐富，不過都幾飽，最好share食。
第3位 Owens
圖：超近港鐵站嘅地理優勢，加上純白簡約木系裝修，令呢間Café小店長期保持人氣。炭燒美國安格斯肉眼牛扒煎到啱啱好5成熟，控制得幾好。牛味濃郁，又保存到肉汁。甜品係成餐嘅重點，伯爵麻糬蛋卷再搭多塊lotus焦糖餅真係冇得輸，蛋糕鬆軟，麻糬Q彈，食完好滿足。
第2位 川滿居（*新上榜）
圖：冬天特別想食辣嘢，銅鑼灣呢間主打四川同京川菜嘅餐廳就啱晒咁多位辣椒仔女。金湯酸菜魚選用桂花魚製作，啖啖滑捋捋，但講到驚喜，鮮椒魚可能更勝一籌。鮮椒魚湯底用咗兩種辣椒煮成，香辣濃味過足癮。特別推介香辣魚皮，重點喺啲汁度，麻辣感重，入味到要啜埋啲汁。
第1位 Royal INN （*新上榜）
圖：12月係聖誕月，慶祝、聚餐當然就會揀間靚靚仔仔嘅餐廳。呢間走宮廷風，仲有（偽）法國凱旋門加水晶燈，自然成為約會首選。鮮波士頓龍蝦意大利飯夠晒吸睛，龍蝦肉彈牙鮮甜，粒粒意大利飯仲吸盡龍蝦湯嘅精華，味道濃郁。最特別嘅係有威靈頓羊架，酥皮鬆脆，中間仲夾住層薄薄地嘅巴拿馬火腿，羊肉肉汁留得住之餘，仲多重鹹香。
訂座優惠：每人消費滿$250即送白松露薯條或法式班戟一客 (即日起至3月3日) (按此)
文：Kar
