可能因為上個月慶祝聖誕同除夕，12月嘅十強餐廳都以打卡西餐廳同肉類料理為主，氣氛好之餘又食得夠盡興～
第10位 燒烤堂（*新上榜）
圖：肥dodo
串燒配啤酒，最啱一班人聚餐傾偈慢慢嘆～呢間串燒餐廳有幾間分店，今次由尖沙咀店打入十強，佢嘅原片燒雞皮薄脆又香口，係唔少人嘅必點款式之一；加上供應日、川、泰、韓等多元化口味，畀食客有更多選擇。
第9位 捌加廿陸天婦羅居酒屋（*新上榜）
圖：天婦羅定食食得多，而呢間小店就好似車仔麵咁可以自選配料，自由度大好多之餘；配料$8起就有交易，重附送龍蝦味噌湯，CP值高。餐廳二樓採用榻榻米座席，牆身又貼滿日本漫畫等海報，好似去咗日本當地咁，勁有feel又可以打卡影靚相。
第8位 The Bayside（*新上榜） 
圖：既有海景，又可以欣賞180°維港海景，加埋約6,000平方尺嘅露天平台，呢間西班牙餐廳氣氛浪漫寫意，係慶祝節日、撐枱腳嘅好選擇。西班牙特色菜點少得乳豬呢，Suckling Pig皮脆肉滑；而甜品Churros炸得啱啱好，蘸埋朱古力醬更加滋味。
第7位 Shahrazad Lebanese Dining Lounge & Bar（*新上榜）
圖：呢間主打黎巴嫩菜嘅餐廳，由牆身設計、布藝咕𠱸都充滿中東民族色彩，節日嚟聚餐有種出遊嘅感覺，人都開心啲～如果有選擇困難，推介你揀午市嘅semi buffet，自助吧有十幾款料理外，可以自選奄列，如黎巴嫩羊肉腸奄列，主菜則推介Mashawy，一份有齊烤阿拉伯羊肉、牛肉同雞肉。
第6位 金亞淶泰國餐廳 （*新上榜） 
圖：由泰國人主理嘅地區小店，性價比高又足料，吸引唔少上班族。好似泰國必食嘅咖喱，有黃咖喱同青咖喱口味，其中軟殼蟹外層微脆，送飯一流。而受食客歡迎、以原個椰皇呈上嘅椰皇三重奏，有椰子奶凍、椰子凍同椰絲脆脆，口感豐富重好清甜𠻹。
第5位 Black Coffee（*新上榜）
圖：品牌於2020年創立，主打咖啡同西式餐飲，其中日式梳乎里班㦸、髒髒提拉米蘇都好受歡迎～梳乎里班㦸分量十足，招牌提拉米蘇口味帶點酒香，食落濕潤綿密又布空氣感，正！主食方面亦有唔少創意口味，如自家煙燻豬腩配黑啤意大利飯、自家製蘑菇忌廉汁貓耳朵意粉配慢煮口水雞扒都值得一試。
第4位 悅火（*新上榜）
圖：妮妮Neinei
主打京都風爐端燒嘅日式餐廳，店內設有多個打卡場景，包括許願牆、水車、仿榻榻米座席等，早前更提供免費和服體驗，可以著住和服嘆廚師發辦，打卡更加有日本feel呀！而味噌燒廣島蠔、醬燒法國鵪鶉、紫蘇雞皮蝦串都係招牌菜之一，配埋清酒更加風味十足。
第3位 HIKARI
圖：第3度上榜嘅兩層高cafe，採光度高，二樓又，加上白色主調，氣氛更加悠閒寫意，好啱放假去chill一chill。Cafe以西式輕食作招徠，如果係肉食控，不妨試吓煎封法國油鴨髀牛肝菌意大利飯，鴨髀皮肥，肉質酥軟；想輕盈啲亦有西班牙深海紅蝦牛油果他他配芒果珍珠。
第2位 Harbourview Grill（*新上榜）
圖：可以眺望北角碼頭景色嘅西餐廳，設有戶外平台座位，又可以帶同寵物入座，環境舒適。主打嘅意大利同美國菜足料大份，招牌菜更以肉類為主，例如濃汁牛柳10安士、澳洲烤羊架等，啱晒肉食控聚餐呀～
第1位 Apinara
圖：唔只再度上榜，重蟬聯榜首位置嘅泰國菜餐廳！裝修走清雅路線，菜式亦加入創意元素，好似泰式鴛鴦豬手包括滷水同酥炸口味，一次試到兩款截然唔同嘅口感；而泰國菜經常出現嘅菠蘿炒飯就整成升級版，皆因配上大大隻燒珍寶河蝦，好似一個價錢試兩道菜咁。
文：Cathy
