第六屆亞洲50最佳餐廳完整得獎名單新鮮出爐！今年有9間香港餐廳上榜，比去年7間多出2間。有新餐廳上榜，其他餐廳排名亦有上升或下降，甚至跌出榜單。不過最意外嘅係有中菜餐廳得到最佳進步獎！
第7位 Amber（↓）
連續10年(2009-18)得到米芝蓮二星殊榮，亦係優秀開飯熱店大賞最優秀法國菜餐廳嘅長勝將軍，Amber廚藝總監Richard Ekkebus對現代法式菜餚嘅用心再次得到認可。採用傳統法國烹調技巧配合嚟自世界各地嘅新鮮食材，菜單每隔三個月都會更換一次，保持新鮮感。雖然今年排名下跌，不過就連續第三年得到中國最佳餐廳獎項。
第13位 8½ Otto e Mezzo BOMBANA（↓）
去年得到終生成就獎嘅意大利名廚Umberto Bombana，旗下餐廳一向都有水準保證。香港旗艦店唔單止係意大利境外第一間獲得米芝蓮三星評級嘅意大利餐廳，更加連續7年維持三星評級，不過今年喺亞洲50最佳餐廳名單上就跌出十強。必點招牌菜包括手工意大利麵同松露菜式。
第16位 Ta Vie（↑）
呢間法日創意料理餐廳嘅主廚佐藤秀明先生，係高級懷石料理店天空龍吟日本料理創辦總廚山本征治先生嘅徒弟。餐廳出品秉持精心挑選時令食材嘅精神，再糅合法日嘅烹調技術，為各位食客奉上一個個非凡味覺之旅，難怪可以比去年成功晉升17個名次！
第22位 大班樓 （↑）
縱然近年未有米芝蓮星星肯定，但依然係唔少老饕心中最好嘅粵菜館之一，由去年嘅47位躍升至今年嘅22位，同台北嘅MUME一樣上升咗25個名次，同時獲得最佳進步獎！出品同餐廳裝修嘅感覺一樣，沉實而暗藏心思。招牌菜包括雞油花雕蒸花蟹、酥炸蟹肉香菇盒，同十八味豉油雞，都係食得出廚師功架嘅心機菜。堅守傳統之外亦有創新之處，例如甜品就係少見嘅桂花杞子雪糕。
第24位 龍景軒（↓）
同樣屬於米芝蓮三星餐廳，呢間新派高級粵菜館由擁有多年經驗嘅陳恩德師傅出任行政總廚，糅合上盛食材、烹調技術，同精緻賣相嘅點心最能夠彰顯餐廳嘅特色。當然典雅嘅裝修，同維港開揚景色亦係令整個用餐體驗更難忘嘅元素。
第32位 Neighborhood（新上榜）
又一間法國菜館，呢間餐廳一如其名走比較親切嘅路線，服務貼心，門面低調，令人感覺舒適Cozy。由香港主廚David Lai主理（同時亦係西環Fish School嘅主理人），餐牌每星期更新一次，選擇精簡，以法國及意大利菜為主，同時糅合各國新派菜式元素。
第40位 Belon（新上榜）
中環時尚法國菜館，菜單選擇唔算多，但就係貴精不貴多嘅例子之一。皆因主廚James Henry擅長突出食材本來嘅風味，而且挑選當季新鮮食材，因此餐牌大部分菜式會每星期更換一次，令食客每次光臨都有驚喜。而餐廳供應嘅酒大部分亦係嚟自法國，環境亦優雅舒適。
第41位 Ronin（↑）
去年香港區唯一新上榜嘅日式居酒屋今年上升至41位，作風低調，無任何招牌之餘更需要網上訂座。但推開灰色大門又另有一番天地，從每日更改嘅菜單就感受到誠意，背後原因係廚師會按當日從本地魚檔同日本空運得到嘅新鮮海鮮決定菜式，例如海膽花蟹就以日本北海道海膽配以本地花蟹肉。
第46位 Caprice（重新上榜）
同樣得到米芝蓮星級肯定，亦係優秀開飯熱店大賞最優秀法國菜餐廳嘅長勝將軍，呢間位於四季酒店嘅高級法國菜館繼2015年嘅42位之後，今年再次登上亞洲50最佳餐廳榜單。餐廳精選法國空運食材，烹調出令人難忘嘅現代法式佳餚。值得留意嘅餐廳嘅糕點師傅Nicolas Lambert亦成為本年亞洲最佳糕點師。
比較返上年嘅名單，當中L'Atelier de Joël Robuchon跌出榜單，Caprice重新上榜。亞洲最佳糕點師獎由香港Caprice嘅Nicolas Lambert獲獎，最佳進步獎由大班樓及台北嘅MUME同時奪得。
亞洲最近餐廳再次由曼谷分子料理餐廳Gaggan再度「冧莊」，而亞洲最佳女廚師就由以創新方式演繹傳統泰菜，曼谷米芝蓮一星餐廳Paste嘅Bee Satongun奪得（睇亞洲地區得獎餐廳精華！）。
延伸閱讀
《2018亞洲50最佳餐廳 》地區精選推介
《2017亞洲50最佳餐廳 》香港上榜名單
《2017亞洲50最佳餐廳 》地區精選推介
《2016亞洲50最佳餐廳 》香港上榜名單
《2015亞洲50最佳餐廳 》香港上榜名單
圖：Asia's 50 Best Restaurants
文：Cathy