2022亞洲50最佳餐廳香港六間餐廳上榜

2022年度「亞洲50最佳餐廳」完整名單現已公佈，今年以線上頒獎典禮為主，加上喺澳門、曼谷、東京三個地區嘅慶祝活動。嚟到第十屆，今年香港共有六間餐廳上榜，當中有開業不足一年嘅中菜館一上榜就進佔第34位！

第5位　大班樓（↓）

去年一躍登上「亞洲最佳餐廳」寶座嘅大班樓今年跌至第5位，奪得「中國最佳餐廳」榮譽。餐廳專注於粵菜，精挑細選最優質最新鮮嘅食材，例如喺上水自設農場做生曬臘肉同醃漬，亦嘗試種植有機瓜菜。改寫粵菜多以上湯入菜嘅傳統，改為自家煉油或肉汁，包括蝦油、雞油、辣油等以作提鮮，令每道菜嘅風味更為獨特細膩。

第9位　Neighborhood（↑）

老闆兼主廚David Lai今年亦奪得Inedit Damm 主廚之選獎，David會每日親自到街市，採購當日最新鮮嘅本地海鮮。菜單會每日更換，更會有熟客先識點嘅隱藏菜單，部分菜式例如用本地走低雞製作嘅烤雞肉雞雜羊肚菌飯需要預訂。

第24位　Caprice（↑）

呢間米芝蓮三星法國菜餐廳舊年重新上榜後，今年更上升至24位。由名廚Guillaume Galliot 主理，將和牛、魚子醬等多款高級食材以經典法式技藝發揮出極致滋味。加上環境、服務亦一絲不苟。

第32位　MONO（↑）

由委內瑞拉籍主廚兼餐廳創辦人Ricardo Chaneton主理，餐廳致力展示南美豐富多元嘅飲食文化及歷史，配合主廚嘅法式高級料理烹飪手藝，為食客帶嚟獨一無二嘅體驗。另一特色係餐廳係本地第一間以原生可可，由零開始製作朱古力嘅法國菜餐廳。

第34位　永（新上榜）

由奪得米芝蓮一星及連續3年登上嘅「亞洲50最佳餐廳」餐廳VEA行政總廚Vicky Cheng主理，主打重新演繹嘅傳統中菜，保留「不時不食」嘅精髓，加入其中西合璧嘅新派烹調技術。例如設有乾式熟成櫃，製作自家乾式熟成臘肉、乳鴿等。

由有「白松露之王」美譽嘅名廚BOMBANA Umberto創辦，創下首間意大利境外奪得米芝蓮三星榮譽嘅意大利餐廳記錄。餐廳以時令食材創作正宗意大利菜，當中嘅白松露菜式最為著名，手工意粉亦係必食之選。

香港新上榜餐廳中以永（第34位）排名最高、其餘順序為：Godenya（第64位）、新榮記（第77位）、Batard（第82位）、L'Envol（第88位）、CHAAT（第96位）及鮨晴（第98位），共有七間。

同去年名單比較，四間香港餐廳跌出頭50名，分別為家全七福（去年48→本年53）、Ta Vie（去年38→本年60）、VEA（去年16→本年60）、Amber（去年37→本年83）。

延伸閱讀

《2021亞洲50最佳餐廳》香港上榜名單
《2020亞洲50最佳餐廳》香港上榜名單
《2019亞洲50最佳餐廳》香港上榜名單
《2018亞洲50最佳餐廳》香港上榜名單
《2018亞洲50最佳餐廳》地區精選推介
《2017亞洲50最佳餐廳》香港上榜名單
《2017亞洲50最佳餐廳》地區精選推介
《2016亞洲50最佳餐廳》香港上榜名單
《2015亞洲50最佳餐廳》香港上榜名單

文：Cathy.H
圖：官方網站