各位漢堡fans，今日係漢堡日呀！美國同澳洲好多漢堡店都會有免費漢堡、做特價或者推出特別口味嚟慶祝，香港雖然唔覺有，但都可以食返個漢堡應一應節吖！以下有幾間心水推介，睇吓邊間啱你口味？
五星酒店廚師主理 Beef & Liberty
圖：美食無止境~
由前文華東方酒店行政總廚Uwe Opocensky主理，兼曾獲米芝蓮，質素超班，用天然草飼牛肉製作漢堡扒，肉味濃郁又juicy！招牌作有芝士漢堡及黑椒香濃漢堡，特色口味可以揀紅菜頭或新出嘅炸軟殼蟹漢堡，環境同座位舒適，食快餐都有fine dining感覺！
熟成牛肉炮製 The Butcher’s Club Burger
圖：呢間餐廳嘅牛肉特別講究，自設熟成工場，牛肉至少經過兩星期或以上嘅乾式熟成(Dry Aging)，肉味變得濃縮而且肉質更鬆化。除咗經典口味亦有秘密餐單，如配泡菜嘅Wu Tang-Style，亦有期間限定嘅Beyond Burger素肉漢堡等。鴨油薯條都香脆好味！
首創帶子漢堡 Honbo
圖：呢間創意小店位於灣仔日街，款式唔多，但堅持用本地食材製作，漢堡扒係本地牛腩加美國牛肉鮮製，蔬菜亦是元朗農場出品。必吃坊間好少見的帶子漢堡，用刺身級帶子製作，略略煎香兩面，飽滿多汁，有特色！環境清幽寧靜，似坐喺cafe咁舒服。
日本過江龍 5019 Premium Factory
圖：呢間漢堡店來自四國高知縣，主打以和牛、鰹魚、茄子等當地名物製成的龍馬漢堡，加上Demi-glace醬汁，足足120克重，成個漢堡超厚身，賣相夠晒震撼！另外亦有BLT漢堡、辛辣烤雞漢堡其他款式，配埋菠菜沙冰就冇咁膩啦。
港式黯然銷魂堡 W Burger
圖：位於九龍城嘅小店，款式非常多，特別口味包括吉列蠔、大烤菇等等，全部選用美國牛肉製成。不過得意之作係充滿港式風味嘅黯然銷魂漢堡，用上自家製特大菠蘿包，入面係超厚切叉燒加隻太陽蛋，一切開蛋漿流到成個包都係，仲唔黯然銷魂？
文：Perrins