食咗咁耐外賣同住家飯，上個月嘅疫情有和緩嘅跡象，觀察所見就開始多返人出街食喇。十強名單內有唔少都係新上榜嘅餐廳，當中又以café 小店為主，可以話係大家都樂見嘅景象呢。
第10位 京都勝牛（*新上榜）
圖：嚟自京都嘅吉列牛排店，沿用總店「黃金60秒」嘅做法，以攝氏190 高溫炸牛排至三分熟，外層酥脆嘅同時內裡肉質依然鮮嫩，牛魔王第一次去嘅話，必試「招牌京都勝牛三味套餐」，咁就可以一次過試勻炸翼板、菲力同薄片醬味牛。
第9位 R.I.M.K（*新上榜）
圖：呢間café位置有少少難搵，但可能因為3月做緊加$1任食日本福岡蛋糕優惠，深受歡迎而成功擠身十強。餐廳主力提供多款意粉輕食，例如蒜香辣椒蜆肉意大利粉配軟殼蟹、點墨汁意大利飯配北海道刺身帶子等。加$1就可以任食蛋糕真心幾抵，蛋糕有12款味道選擇。而且口感輕盈，食多幾件都唔怕膩。
第8位 本店（*新上榜） 
圖：iamlotng
將軍澳難得有高質日本料理，自然大受區內街坊愛戴，開業冇耐已經打入十強。餐廳由前日本米芝蓮星級廚主理，供應多款居酒屋菜式，你數得出嘅壽司、刺身、串燒、關東煮等通通都有，特別推介和牛日本土鍋飯，選用日本宮崎縣A4和牛，入口即溶，油花又香，加多隻生蛋黃就夠晒吸引。
訂座優惠：全單85折
第7位 Boon （*新上榜） 
圖：呢排大家都好鍾意搵啲小清新感覺嘅café去打卡，觀塘呢間就係其中一間，重有好多乾花擺設。推介灸燒左口魚邊配蘆筍意大利飯，平時灸燒左口魚壽司就食得多，配落risotto度原來一樣夾，魚油滲透飯粒，啖啖香口。虎蝦海膽醬意粉亦係另一道必食菜式，意粉彈牙掛汁。
第6位 Lagom Kaffe
圖：繼續留榜嘅樂感，上個月都係第6位。餐廳嘅戶外用餐區加藤梳化，悠閒舒服，絕對係一大賣點。推介可試台北燉牛肉意粉，微微辣但麻勁十足，幾過癮。甜品同飲品都做得幾出色，戚風蛋糕同巴斯克芝士蛋糕都係好多朋友仔嘅心水呢。
第5位 豐信餃子店（*新上榜） 
圖：餃子可以話係香港人其中一樣comfort food，又平又快又飽肚。呢間餃子店嘅餃子，每日新鮮製作，有湯餃有煎餃，招牌係芝士粟米鮮肉餃，芝士味香濃，重有肉汁添。另外仲有芫荽黨最愛嘅芫荽鮮肉餃，味道夠晒突出。煎餃固然脆口，但湯餃嘅湯底同樣吸引，係香噴噴嘅椰子海帶鮮雞豬骨濃湯，陣陣鮮甜。
第4位 Urban Coffee Roaster（*新上榜）
圖：呢間唔止係咖啡店咁簡單，重有好多自家品牌出嘅精品賣。特別highlight下佢哋嘅甜品，法式焦糖班戟，三層嘅班戟厚厚der，完全唔係平時空氣感嗰type，係啖啖扎實口感，真係食得飽人嗰種，沾埋微焦微甜嘅焦糖醬同布甸醬，層次更分明。鍾意朱古力嘅朋友，可以試下佢哋嘅朱古力，有成85%選擇，夠晒香濃，甜過後就有回甘。
第3位 茶聊
圖：睇個名都知呢度以茶為主題，髒髒黑糖珍珠鮮奶係其中一款幾受歡迎嘅嘢飲，賣相最啱打卡，珍珠彈牙，甜度適中。除咗多款特色茶飲外，食物方面亦落足心思。原隻龍蝦包配薯條最為吸引，混入蛋黃醬、蟹籽等製作，蝦肉彈牙，用牛油烘過嘅麵包當然零舍香口。
第2位 露面手工拌麵料理（*新上榜）
圖：呢度主打拌麵同湯麵，油撥辣子魯肉biang biang麵富有特色，油潑辣辣椒醬係自家製嘅，香辣度高，都唔係話咁容易就挑戰到特辣lvl呀。改良過嘅biang biang麵，幼身啲薄身啲，比原來嘅更加有咬口同掛汁，要索晒啲辣汁當然冇問題啦，條條都入晒味架！
第1位 Med Chef（*新上榜）
圖：近排好興CBD，即係大麻二酚，咩嘢食都話可以加CBD落去，而呢間就係全港第一間以CBD為主題嘅多國菜餐廳，跟到個潮流咁貼，難怪咁快就可以登上榜首位置。首推香烤威靈頓三文魚配秘魯黃椒醬，酥香肉鮮兼帶有甜味，層次豐富。
訂座優惠：主菜餐牌 Lunch Set正價9折
文：Kar
