燒肉係一大班人聚餐時最好嘅活動之一，去埋放題無顧忌咁食仲開心！今期介紹4間日式燒肉放題畀大家，有佐賀A4和牛主題、獨特嘅水煎鍋食法等～

水煎鍋燒肉放題 上州一頭和牛 

獨特嘅水煎鍋燒肉，四款150分鐘放題均備有水煎鍋食法或傳統燒肉食法可供選擇。水煎鍋食法類似火鍋加燒肉嘅合體，燒爐旁邊有一圈可以放湯，將牛肉浸完湯再放上中間水煎就無咁油膩，餐廳可以免費轉一次鍋，好貼心！最受歡迎係10品A5和牛白鱔刺身套餐，可一次過任食日本A5和牛、澳洲M7和牛、白鱔、蒜蓉海鮮等超過50多款配料同美食。最近更推出Keto Friendly套餐，減肥人士都可以盡情食燒肉！

任食佐賀A4和牛 佐賀燒肉谷   

主打日本九州佐賀縣農場空運直送嘅佐賀和牛～日本佐賀A4和牛海鮮放題可品嚐日本九州和牛6個唔同部位。包括和牛三角嫩肌、和牛薄炙牛肋肉、和牛肩胛、和牛角切、和牛小排，以及和牛牛肋條，各有風味。餐廳上年年尾更首次登陸港島區，銅鑼灣分店佔地逾2,000呎，寬敞舒適，抽風良好，啱晒同家人朋友聚餐。

日本過江龍 宮崎肉本舖  

圖：西里爾

日本九州宮崎肉本舖香港店，主打宮崎A5櫻花牛燒肉放題，更定期以一頭牛方式購入和牛；除咗有各款和牛，仲有稀有部位食。日式和風裝修配全店卡位，仲有7間靠窗嘅半開放式包廂同榻榻米座位，私隱度比一般燒肉店高，可以一邊欣賞維園靚景，一邊享受燒肉。A5和牛特上套餐包咗6款九州A5和牛，外後腿肉同五花腩係任食；和牛雪花紋好靚，油脂分布均勻，入口柔軟嫩滑。另有超過60款食物選擇，啱晒追求高質和牛嘅大胃王。

鹿兒島A5黑毛和牛 牛川日本和牛專門店 

圖：meiyin129

餐廳老闆於日本岩手縣設有自家農場養殖黑毛和牛，頭半年以草餵飼，之後再用威士忌酒嘅hop去做飼料，令牛肉肉色更紅潤。「至尊日本和牛放題套餐」有多款A5和牛燒肉，餐廳首先會畀晒咁多款大家試，之後可以隨意追加鍾意嘅部位。最正係可以試埋飛驒牛刺身、蠔刺身同油香十足嘅白鰻魚，款式應有盡有。

文：Yanica
編：Cathy