滑溜香濃嘅雞蛋配上惹味嘅醬汁同白飯,簡直就係最和諧嘅配搭。蛋包飯可以話係日本其中一樣具代表性嘅美食之一,喺香港除咗可以食到日式餐廳嘅正宗口味,仲有唔少fusion餐廳同茶記都有供應,一齊嚟睇睇有咩唔同~
目錄
► 東京老字號蛋包飯:グリル滿天星 |
東京老字號蛋包飯 グリル滿天星 ![](https://static5.orstatic.com/userphoto/Article/0/8C/001NB72DACB8248CB9BF8Aj.jpg)
圖: 100胃
來自東京、1978年已經開業嘅蛋包飯專門店,糅合日法烹調方式製作和洋料理,上年終於登陸香港,仲有香港限定口味添~滑蛋選用蘭王蛋製作,鮮色又重蛋味。飯底有3款,分別係炒焗飯、番茄飯及咖喱飯,選用本米連同竹筍、洋蔥、粟米、香菇等8種食材,一齊放入秘製雞湯中先煮後烤焗,本身已經好夠味,配上唔同嘅醬汁又更豐富。香港限定蒲燒鰻魚蛋包飯,鰻魚超大條,鰻魚汁鹹淡適中,唔會好似坊間嗰啲太甜而蓋過其他食材味道。
灣仔超人氣店 貓之眼 ![](https://static5.orstatic.com/userphoto/Article/0/8C/001NB72DACB8248CB9BF8Aj.jpg)
圖: Thybesals
灣仔街坊或者附近返工嘅人士應該對呢間鋪唔陌生啦~由日本人主理嘅人氣蛋包飯專門店,招牌三色蛋包飯一份有齊兩個口味,分別係咖喱豬肉+濃茄牛肉,咖喱飯甜甜地,濃茄牛肉番茄超濃而且牛肉炆得好腍。漢堡扒配醬汁蛋包飯都好推介,和牛漢堡扒非常厚身,入口肉汁豐富充滿牛味,配埋燴牛肉汁送飯一流~
韓式烤肉流心蛋包飯 Banchan and Cook
![](https://static5.orstatic.com/userphoto/Article/0/8C/001NB72DACB8248CB9BF8Aj.jpg)
唔係淨係日式餐廳先有出色蛋包飯!呢間韓國餐廳一樣咁高質, 烤牛肉蛋包飯上菜時已經見到佢好有彈性咁,一切開蛋皮入面啲蛋漿好似熔岩咁流出嚟,超滑溜同時蛋香十足,帶一點點牛油香!甜甜嘅韓式牛肉配埋番茄炒飯底,無得輸呀。另外仲有其他蛋包飯都好值得一試,如明太子慢煮雞肉同泡菜燉五花肉等。
地道咖喱蛋包飯 華記士多
西灣河一間地道茶記竟然有蛋包飯食?你冇睇錯呀,唔單止有得食,網上仲有唔少人吹捧添。佢就只供應兩款咖喱蛋包飯,一款原味,另一款就加咗芝士,咖喱汁食落濃郁,蛋都好滑,飯底係雞粒炒飯,粒粒分明,而且份量又多性價比都幾高。
元朗抵食外賣店 風之谷蛋包飯 ![](https://static5.orstatic.com/userphoto/Article/0/8C/001NB72DACB8248CB9BF8Aj.jpg)
圖: yuchiro
元朗新開嘅外賣店,旋風蛋包飯可以話最受歡迎。推薦黑松露雜菌蛋包飯,一開盒就好香,蛋混咗黑松露醬,雜菌亦用黑松露醬炒過,滿滿都係黑松露香氣!燒汁肥牛蛋包飯都幾高質,飯底有用燒汁煮過,肥牛亦有用蒜蓉炒香,誠意滿分。
文: Yanica