最傳統嘅熱狗就係簡單嘅麵包配上熱狗腸同醬汁。不過時至今日，熱狗嘅配搭已經千變萬化，餡料已經唔限於腸仔咁簡單，醬汁同麵包都各有特色～今期呢5間熱狗店睇下邊間啱心水！
老牌熱狗店 德國熱狗
圖: 已經有接近30年歷史嘅老牌熱狗店，喺多區都有分店。能夠屹立咁多年當然有佢嘅優勝之處。講個包先，熱狗包向相熟嘅麵包工房攞貨，全人手製造，每日新鮮運到。至於熱狗腸就喺一間由一位叫Mr. Karl Konrad Pschorr嘅德國製肉專家主理嘅香港廠房拎貨，真係零舍不同！人氣款式有香蔥豬柳腸熱狗、脆皮煙肉火腿腸等，唔想食包都可以試下原條波板芝士腸，好可愛～
火炙芝士熱狗系列 白羊 • 座
圖: 雖然呢間餐廳就唔係熱狗店但佢嘅特色熱狗餐好受歡迎㗎～佢哋主打火炙芝士熱狗系列，一共有7款口味，最人氣分別係火炙芝士黑松露滑蛋熱狗同火炙芝士鰻魚滑蛋熱狗，前者黑松露味都幾突出，恰到好處又唔會搶走蛋香，而且雞蛋仲好滑。後者鰻魚都幾厚肉，配埋香甜嘅鰻魚汁無得輸。
特色炸雞熱狗 J大大
圖: 元朗區嘅街坊應該對呢間熱狗店唔陌生，所有熱狗即叫即製熱辣辣，麵包外脆內軟。最多人叫招牌J熱狗，餡料有熱狗腸、熱溶芝士、煙肉碎、茄汁及黃芥辣，熱溶芝士份量好多，芝士味唔算好濃烈反而無咁膩～另外炸雞/芝士炸雞熱狗都好有特色，加入炸雞粒、生菜絲同千島醬，炸雞粒保持香脆，味道有啲似炸雞漢堡包，值得一試～
經典醬爆+三重芝士 熱狗太太
圖: SherryTT
正所謂經典就是永恆，太太秘製經典醬爆熱狗雖然配搭上都係芥末醬加酸瓜及番茄醬等，但店主將啲酸瓜切碎同啲醬汁撈埋一齊，加埋脆煙肉碎，好有心思，而且醬汁份量夠晒多。鍾意芝士嘅必食芝士三重奏，有車打芝士、mozzarella同巴馬臣，芝士味好香濃，仲會拉絲添！
黑啤肉醬 Bulldog Hotdog 
圖: 呢間啲口味真心有特色，坊間少見。如黑啤肉醬，材料用咗特製豬肉醬、白車打芝士、橙車打芝士、寶伐朗芝士及蜜糖芥末醬，味道可能因為加咗啤酒，唔會太死鹹，多咗淡淡嘅甘味！香辣手撕雞用料包括新奧良雞絲、蕃茄、洋葱、青葱、炸蒜、香草白汁同特製辣汁，味道同口感都好豐富。
文: Yanica