好多人都鍾意食粥，特別係有時想食得清淡少少，或者排毒養生，就更加想搵啖熱粥食下！講到廣東粥，將白米煮至稀爛，煲到口感綿密至為上品，再加入唔同食材熬令味道更豐富。以下呢5間粥店都係老字號或街坊間好有口碑嘅店舖，每一間都有其過人之處。
鑊氣生滾粥 妹記生滾粥品
圖: CHING_ing
以鑊氣粥而聞名、超過40年歷史嘅粥店。首先講個粥底，以一斤鹹水魚同一斤米嘅比例煲成，每一碗粥都新鮮綿滑，濃稠度啱啱好，而且充滿魚嘅鮮味。招牌魚腩粥先將魚腩同大蔥放入銅鍋內爆香，再灒酒去腥，最後加入魚湯粥底同煲。魚腩肥美新鮮無泥味，粥底都好鮮美，果然係招牌！另外牛肉粥、肉丸牛肉粥、粉腸肉丸粥同魚片及第粥都好受食客歡迎，爽魚皮好多人都會叫埋配粥食，又滑又爽脆而且一啲腥味都無，配埋豉油、蔥同薑絲，好食到停唔到口！
刺身級帶子豬潤粥 靠得住粥麵小館 
圖: 天天食好野
已經係連續5年獲得米芝蓮推介嘅粥店，以自家鮮魚湯粥底馳名，亦係第一間獲得米芝蓮車胎人美食推介嘅粥店。必試係心肝寶貝粥，魚粥煮足4小時，以5至6種共18斤嘅魚煮成湯，加入刺身級帶子同黃沙豬潤，帶子呈半熟，非常鮮嫩，粥面泛起一層來自豬潤嘅黃油，鮮甜綿密，令人一試難忘呀。另一名物鱔球豬潤粥都一樣咁足料好味～
馳名魚粥 新興棧食家
圖: 卡牛井
一樣以魚粥馳名嘅粥店，魚嘅咩部位都有得食，除咗常見嘅魚腩、魚雲、魚片等，仲有魚咀、魚尾、魚鮫、魚骨、魚鬚同魚鰾等坊間少見嘅部位。廚師會將材料炒香先將魚拎去煮粥，難怪咁鮮甜啦，而且每一件都好足料大嚿，愛魚人士必試！
足料靚粥 發記腸粉粥品
圖: sukiyi126
由元朗發跡，到而家喺唔同區開咗幾間分店嘅粥品專門店，除咗粥仲主打腸粉。佢哋嘅粥以綿滑及足料聞名，粥嘅款式非常多，唔少人都鍾意食呢度嘅雞粥，粥底有淡淡雞油香，口感軟綿綿，雞肉夠嫩滑而且好多，料多過粥！靚靚及弟粥都幾出色，豬膶新鮮，而且厚薄都好適中，入口好嫩。
鮮甜砂鍋海鮮粥 知粥嘗樂
圖: 山區麵包王
一間新派少少嘅粥品店，主打砂鍋海鮮粥，所有海鮮嘅鮮味都滲晒入粥底到，未食都知鮮甜！選擇有蝦蟹粥、沙巴龍躉魚粥、鮑魚雞粥、鮑魚蝦蟹粥同蠔仔肉碎粥等，粥底又綿又鮮甜，而家有大鍋及小鍋選擇，好貼心～
文: Yanica
編：Kar