12月終於有冬天嘅感覺，天氣凍無咩開心得過整返碗熱辣辣嘅湯麵！平時食米線多數都會食酸辣或麻辣等口味，今次推介5間以雞湯底為主打嘅米線店畀大家，健康好味之餘食完真係成個人都暖晒呀～

目錄

上水人氣醉雞湯 鳳鳴居

北區人一定知道嘅米線店，招牌菜係醉香雞湯米線，一上菜就聞到濃濃酒香味，湯底用幾十隻雞、當歸、川芎、白芷及黨參等藥材熬製，一入口只有淡淡藥材味、黃酒味及雞湯鮮甜味。雞件有大約6-7件，酒香都幾出，米線都好爽滑呀～仲有芫荽雞湯米線同喇沙雞湯米線等選擇，小食推介黃金魚皮同辣豉油爽脆鵝腸！餐廳無幾耐前喺旺角開埋分店，唔使特登走入上水食喇。

圖: Blue-

足料砂鍋雞湯 醉藥雞  

招牌砂鍋醉藥雞，雞湯熬過夜煲成足料雞湯後，加入糯米酒、紅棗、雲耳、淮山煮成雞酒，補而不燥，有助行氣活血。湯底酒香同雞油香都好突出，味道鮮甜香醇。最正係即叫即煮，用砂鍋生滾嘅方法同時煮湯底、麵同雞肉，咁兩者同時都會入晒味，雞肉選用三黃雞，嫩滑又無咩脂肪，雞味都好香濃呀。

圖: natfoodiary_

多口味雞湯米線 農米莊     

呢間嘅米線有好多款唔同嘅雞湯底，如椰子雞湯、黑蒜雞湯、藥膳雞湯同麻辣雞湯等，多到唔知點揀呀～推介椰子雞湯米線，椰子味濃郁清甜唔油，帶少少奶香，配料有農米雞、椰子絲、冬菇、雲耳、支竹及生菜，好養生。招牌藥膳雞湯米線好足料又唔會過鹹，重口味嘅朋友要食黑蒜雞湯，湯底濃郁蒜味又香。

圖: 吃貨史努比

蟲草花膠雞湯米線 原作養生湯米線 

呢間米線店都係以養生為主㗎，桃膠椰子雞湯米線湯底清甜，飲晒成碗都唔會口渴，仲有粒粒有口感嘅桃膠食添。蟲草花膠雞湯米線都好受歡迎，雞肉嫩滑，花膠都有兩三件，幾重膠質，絕不欺場，湯底雞味都幾濃厚同埋帶有少少花膠嘅creamy！另外小食桂花蜜糖雞翼係必食呀，香甜惹味～

圖: wtf._.99on

招牌花膠雞米線 連文記冰室

一樣係主打花膠雞米線嘅冰室，午飯時間經常大排長龍㗎。湯底飲得出真材實料，係好純同濃濃嘅雞湯，飲完都唔會口渴。花膠畀得一啲都唔手軟，有3-4件，口感彈牙，啱晒女士們食～想暖胃嘅可以試埋胡椒豬肚雞米線，胡椒味香得嚟又唔太辣，豬肚洗得好乾淨無怪味，難怪咁受歡迎。

圖: NekoP

文: Yanica