晚市返嚟梗係要約朋友gathering！講到聚會食咩，日式燒肉都係其中一個好選擇，一邊食燒肉飲返杯一邊傾偈，簡直係人生一大享受～但日式燒肉選擇咁多，今期一於介紹5間CP值高嘅舖頭畀大家，包括尖沙咀人氣燒肉、銅鑼灣放題、日式石燒牛專門店、專食得獎A4薩摩牛嘅日本過江龍同另一間日本連鎖燒肉店，食完都唔會肉痛！溫提一下，而家經OpenRice訂座，更可按訂座人數賺取返相應嘅Rice Dollars架。
二人同行一人半價放題 燒鬼 
餐廳以神秘嘅日本民間傳說為主題，無論裝潢、設計同食物等細節均加入咗唔同嘅鬼怪元素，帶畀食客不一樣嘅燒肉體驗。呢度主打唔同等級嘅燒肉放題，推介$398精品燒肉放題套餐，可以食到多款美國頂級牛肉、如封門柳、肩胛肉眼及牛板鍵香蔥薄燒等；海鮮有海蝦、日本多春魚、醬油迷你墨魚仔等，另外仲有多款刺身、壽司同日式小食，好多選擇。最抵係5月31日前做緊二人同行一人半價（指定時間），唔好等喇～
4000呎抵食燒肉 驚安燒肉商店
佔地4000呎高質又抵食嘅日式燒肉店，雖然係單點但價錢好經濟實惠，叫多多埋單都唔會肉赤！必試九宮格燒牛盛合，分別係牛小排、辣漬翼板肉、一口牛梅花、牛小排、A4和牛三角、牛護心肉、肉眼、厚切牛舌同果漬牛肋條，啱晒貪心嘅你。日本A4和牛西冷入口即溶又鮮嫩多汁，厚切牛舌芯都好值得一試，外脆內軟！
日式石燒牛專門店 直燒和牛商店
雖然都係燒肉但呢間就主打熱石石燒A4和牛，最抵食係$98任食吉列牛舌，平時吉列牛扒就食得多，吉列牛舌真係好少見～每邊燒幾秒就食得，食落柔嫩多汁，牛味濃郁。A4和牛厚燒都係百幾蚊就食到，入口即溶油香滿溢，呢個價錢有咁高質素好難得。如果鍾意甜鹹滋味，A4 和牛壽喜薄燒雪花分布平均，配上蛋漿同壽喜燒汁送飯食一流。
圖: 抵食豪華套餐 牛繁
一大班人去食燒肉，可以考慮下呢間尖沙咀同荃灣都有分店嘅日本過江龍。四至五人前豪華套餐價錢唔貴又高質，有齊7款靚牛，包括日本霜降黑毛和牛西冷、極上M9霜降和牛肩翼板扒、特上M9和牛肉眼扒、上級里脊肉配月見汁、厚切牛舌、特上牛胸腹肉同特上牛五花，日本霜降黑毛和牛西冷一入口感受到滿滿牛脂香。另外有自選豚肉、雞肉、海鮮、野菜盛合、前菜同沙律，份量超多！午市仲有一人套餐，「毒」食都無問題～
任食A4薩摩和牛 上村牧場 
主打價錢親民嘅和牛燒肉放題，餐廳喺日本同台北都有分店，一樣設有「特急列車」送餐服務。燒肉放題分三個等級，最貴嘅套餐可以任食來自鹿兒島自家牧場嘅A4薩摩黑毛和牛，仲有和牛里肌肉、薩摩牛和牛壽喜燒、鑽石紋牛五花、海膽&鮭魚子壽司及松葉蟹壽司，牛魔王去食一定回本！
圖: 文: Yanica