美好的一天由一餐豐富嘅早餐開始～平日工作咁忙，放假食返個超豐富嘅All Day Breakfast差吓電都唔錯～香港有唔少Cafe都有All Day Breakfast食，而且好多都進化到唔係基本配搭咁簡單！開飯仔今期繼續精選咗五間人氣之選，食完真係全日都充滿Energy呀。
重量級之選 Starssy Cafe
元朗好受歡迎嘅全日早餐店，而且性價比好高！呢度嘅All Day Breakfast有分中量級同重量級，嚟得梗係要食招牌$118重量級～包括沙律菜、番茄、牛角包、肉腸、炒蛋、薯角、茄汁豆、牛油果、洋蔥及煙三文魚，唔係淨係得個多字，牛角包烘得香脆，煙三文魚同腸仔都唔會過鹹，份量足足夠晒兩個人食，自己一個食嘅話真係飽到All Day都唔使再食嘢～
圖: 自由配搭+鮮甜龍蝦 The Yell-Owl Seafood And Grill
呢間一樣來自元朗，呢區嘅居民真係好幸福呀～呢度嘅All Day Breakfast除咗固定組合外仲有得自由配搭，咁就可以揀自己最鍾意嘅配搭喇！不過最受歡迎都係呢個超級貓頭鷹全日餐，食物有龍蝦半隻、蟹肉牛油果多士、班尼迪蛋、英式豬肉腸、大啡菇、煙肉、薯餅、扒蕃茄、沙律、焗豆及牛油粟米 。龍蝦大大隻啖啖肉，肉質爽口味道鮮甜，真係值得朝聖，九龍城都有一間分店㗎～
圖: 流心芝士牛角包 Hami Harmony 
必食流心牛角英式早餐，成碟嘢有兩樣嘢係Highlight！包括流心芝士牛角包同焦糖香蕉，牛角包好香脆，一切開仲有流心芝士，芝士味好香濃呀。另外焦糖香蕉都好少喺全日早餐見到，口感脆卜卜，仲有黑松露炒滑蛋、大大塊煙三文魚、牛肉腸、雜菜沙律，款款都幾有誠意。
圖: iampumpkin
自家製Waffle Crispy Bistro
西營盤主打Waffle嘅Cafe，佢哋嘅All Day Breakfast有茄汁豆、炒蛋、薯餅、沙律、煙三文魚、車打芝士腸、烤大蘑菇同埋兩塊大窩夫，窩夫外層香脆內部濕潤，又有蛋香，加埋糖漿食真係好出色！車打芝士腸都令人驚喜，一咬開脆皮係滿滿嘅芝士同肉汁，整體嚟講都好高質！
圖: jcpigpigzhu
南丫島海景Cafe Hideout Cafe Bar
呢度除咗賣All Day Breakfast，仲賣埋超靚嘅海景呀～All Day Breakfast可自選煎蛋、炒蛋或烚蛋、仲有肉腸、烤蘑菇、煙肉、薯餅、茄汁豆、番茄、多士及水果，質素正正常常，但配埋海景真係加唔少分。
圖: Miwo
文: Yanica