唔覺唔覺，2022年已經過咗一半，係時候做個小回顧。呢半年你哋做過啲咩？食過啲咩？呢幾年可能大家都學會咗珍惜呢份功課，趁有機會時就見多啲想見嘅人，食多啲想食嘅嘢。咁啱啱過去嘅6月，又有邊10間餐廳係大家最想食嘅呢？一齊去榜。
第10位 Sour Dough（*新上榜）
圖：由瑞士糕餅師開設嘅餐廳，主力供應多款軟包、薄餅等烘焙品，仲要係用培育咗30幾年嘅酸種麵糰製出嚟，夠晒誠意。其中古巴三文治烘底脆口，帶有麥香，夾住嘅手撕豬肉、煙肉、酸菜等都相當入味。另外仲有坊間唔多地方見到嘅法式甜品Canele呢。
第9位 Terrace in Seaside（*新上榜）
韓國過江龍店嘅人氣當然強勁，成日都有好多人等位。招牌忌廉水果三文治係最多人嗌嘅，選用韓國時令水果製作，包括士多啤梨、柑橘等，簡單得嚟又好啱打卡。另外推介泡菜燉五花肉蛋包飯，輕輕一𠝹，啲蛋汁就流出嚟，控制生熟度剛好。辣泡菜包住五花肉，無論口感定味道都好豐富。
第8位 香香宮煮 
圖：打邊爐已經唔再需要分季節，仲要呢間火鍋店嘅裝潢同餐具等都極具宮廷氣派，兼且更有宮廷服可以畀食客著嚟打卡食飯，入榜當然冇難度。食物方面，亦多以宮廷主題為名，肉食獸可以根據牛肉嘅產地或部位嘅喜好選擇唔同嘅拼盤，例如玉面公主四國牛肉拼盤就有齊美國、澳洲、日本等地嘅牛肉，而花花公主牛魔王拼盤，則有如牛舌等7款唔同嘅部位。
第7位 姚姚酸菜魚（*新上榜）
圖：呢排唔知點解，好多人都忽然挑起想食酸菜魚條根。而喺芸芸酸菜魚店中，呢間選擇幾有彈性，可以揀雙拼，酸菜魚配水煮牛都得，唔怪得可以彈起，入埋十強啦。酸菜魚有微火保溫，份量十足，湯頭酸辣平衡，魚肉軟滑，寬粉係重點，盡吸湯頭精華。
第6位 僕之拉麵（*新上榜）
圖：大食嘅朋友平時可能成日都會覺得一碗拉麵唔夠飽，但嚟呢間拉麵店就冇呢個問題嘞，佢哋勁多料！好似肉愛食者拉麵咁，啲叉燒多到圍住晒碗邊，拉麵係豬骨濃湯底。而每日限量得15碗嘅海老愛食者拉麵亦同樣震撼視覺，7大隻蝦掛邊，啲蝦火炙過嘅，鮮甜濃香，湯底一樣咁濃郁，想試真係要趁早去。
第5位 黑布小巷
圖：繼續留榜嘅台菜餐廳，古早味滷肉飯固然係膽，濕潤多汁，啖啖惹味。不過最吸睛嘅幾時都係啲爆漿嘢。慢烤雞腿芝士蛋吐司理所當然地跑出，溶岩芝士加埋半熟流心蛋，輕易就做到爆餡流漿效果。雞髀肉以慢烤方式處理，滑嫩而保有肉汁，成份吐司夾埋一齊一啖食，係有份滿足感。
第4位 一瀧
圖：由兩位福岡師傅助陣嘅日本料理，富有福岡傳統鄉土菜嘅風味，有唔少菜式更唔係間間都有得食呢。黑麻麻嘅炸雞，加入墨汁製作，無論係個look定係味道都同食開嘅炸雞截然唔同，肉質軟滑，仲有啲啲辣粉好惹味。牛腸鍋絕對值得一試再試，滿滿脂香，湯底清甜，有種返咗去日本嘅感覺。
第3位 GoodDay BadDay（*新上榜）
a圖：呢間餐廳嘅裝修同菜式走玩味風格，更嘗試將海膽變成pizza材料！渾身是海膽虎蝦pizza薄底脆邊，勁多芝士，仲有虎蝦添，加埋海膽喺面感覺幾新鮮。好日梗係芝士龍蝦意大利扁麵都係好啱相機食先，大大條龍蝦尾，肉質爽彈。
第2位 MONMONO（*新上榜）
圖：而家出街食飯，好多人都鍾意揀啲有靚位打卡嘅餐廳。尖沙咀呢間仲要全間以單色深藍色為主色調，個個位都咁靚，難怪開張冇耐已經獲得過萬人收藏兼入榜啦。最靚嗰道甜品係水晶花園 ，透明圓形水晶球入面有椰子金寶，酸甜清新。炒活藍青口‧辣肉腸‧蕃茄忌廉汁以白酒煮製，將鮮味吊晒出嚟，加上藍青口粒粒都鮮甜飽滿，得幾粒唔多夠喉呢。
第1位 鮨竜
圖：日本菜依然係香港人嘅飛佛，榜首嘅呢間Omakase連續兩個月留榜。餐廳選用由日本直送嘅時令食材，刺身款款新鮮味美。好似呢輪有白身魚、真雕、中拖羅等，口感由結實到彈牙、軟嫩都有。壽司以星月光米同三赤醋製作，每款壽司師傅都花過心思作食材配搭，例如障麗烏賊壽司就加埋特製肝醬，味道濃郁。
文：Kar
