7月份嘅十強榜，又回歸café嘅天下，當中有一半都係café嚟，不過唔係打卡café，而係主要坐得舒服、食物又有特色嘅café。其餘一半，分別有泰、日菜同懷舊火鍋店。
第10位 Peko Peko Eatery 
圖：荃灣海旁呢間西日料理再度上榜，主打多國健康主題菜式，可以話係長青菜系。七彩繽紛擺盤勁靚嘅Rainbow For Two有齊多種蔬果，要fit要靚嘅揀佢就啱。另外比較多人嗌嘅仲有海膽三文魚子竹炭烏冬，creamy汁底，又食到海膽鮮味。
訂座優惠：晚市2人及4人套餐 88折
第9位 叁不館（*新上榜）
圖：主打港式火鍋，餐廳裝修仲滿有七、八十年代嘅情懷，霓虹燈、熱水壺，就連播嘅歌都係當年金曲。火鍋湯底如果嗜辣嘅記得揀麻辣湯，麻香刺激，用嚟淥多款唔同嘅牛肉部位就啱晒。如果同枱有朋友唔食得辣嘅都唔緊要，有鴛鴦湯底。
第8位 shh Café（*新上榜）
圖：藝人蘇麗珊有份投資嘅按摩店加café，兩層樓高，供應西式輕食同素食。薯條雖然好多café都會有，但呢度嘅厚切薯條唔同在於，加埋芝士粒同香煎鵝肝喺面，好有油香。另外，火腿蛋熔岩芝士蛋吐司同蒜香牛油白酒煮蜆亦係人氣之選，前者份量十足，後者味道鮮甜。
第7位 富山麵家 
圖：隔咗段時間再度上榜嘅拉麵店，雖然冇咗My Melody主題，但依然儲落一班捧場客。呢度主打醬油湯底拉麵，但同時推介可以試下其他地方較少食到嘅牛奶拉麵或沾麵，淡淡奶香帶有牛油香，特別黃金蟹糕牛奶沾麵，混埋蟹膏後鹹鮮突出，麵條小麥味重。
訂座優惠：全單85折
餐飲券：醬油拉麵套餐 高質黑醬油湯底拉麵 73折
第6位 九龍城同撈同煲（*新上榜）
圖：另一間都係以懷舊香港為主題嘅火鍋店，呢間就再耐啲，以六、七十年代為背景，全店都係打卡位。自家熬煮嘅湯底味道濃郁，其中胡椒豬肚少爺雞湯係幾過癮。就連菜式都跟住係咁懷舊，鵪鶉蛋燒賣都有得用嚟打邊爐。最驚喜係甜品，插住遮仔嘅啫喱真係唔知幾耐冇見過（出賣年齡系列），錦鋰糖不甩就夠晒特別，可以放落湯底淥。
第5位 活（*新上榜）
圖：可以帶埋毛孩一齊去嘅café，仲有埋竉物餐單，難怪大受歡迎，一上榜就可以進佔第5位。推介慢煮西班牙有機黑毛豬薯蓉，慢煮處理令到豬肉依然保持粉嫩色，入口juicy。另外有杯青瓜latte都幾特別下，又幾清爽。
第4位 牛匠石燒（*新上榜）
圖：石燒牛店有好多，要突圍而出，牛嘅質素同款式都好重要。比起一般石燒牛店就咁用石板燒，呢度仲可以有壽喜燒鍋。安格斯西冷肉質香嫩、澳洲M9牛胸肉油脂平均，配埋壽喜燒湯汁仲多咗層甜味。
第3位 i kitchen（*新上榜）
圖：觀塘嘅工廈餐廳，最得人鍾意嘅一點係不設入座限時，有時想同朋友傾耐啲嘅都冇壓力。必叫西班牙海鮮辣肉腸雞肉燉飯，單係擺盤都夠晒氣勢，帶子、青口、大蝦等全部「叉」晒出嚟，足料又吸睛，而且飯粒吸收晒海鮮精華，啖啖鮮香。韓式炸雞球配芝士醬都唔錯，外脆內軟。
第2位 Trois Café
圖：林家謙主題完咗都一樣咁受歡迎嘅呢間餐廳，係7月嘅第2位。多款充滿創意嘅菜式，為食客帶嚟新鮮感。好似龍蝦拿破崙咁，既有牛油香，中間除咗夾住彈牙嘅龍蝦肉外，仲有開心果醬，感覺清爽。甜品同樣出色，檸檬潛水艇有樣有內涵，係另一清新之選。
第1位 Apinara（*新上榜）
圖：泰國菜係好多人喺夏天嘅選擇，呢間嚟自泰國米芝蓮嘅餐廳，菜式選擇多元化，質素亦有保證。36小時慢煮紅咖喱和牛牛肋肉非常入味，甜中帶辣，仲好鬼腍，不論配飯定係薄餅都好惹味。甜品通常會揀芒果糯米飯，不過而家夏天，食榴槤嘅話可以揀榴槤雪糕伴榴槤糯米飯，勁多榴槤蓉，好香口。
文：Kar
