7間本地手工Bagel推介抹茶麻糬/水果夾心/全素之選

唔少人儲糧都會買麵包，唔想下下都方包豬仔包咁悶，其實口感煙韌又扎實嘅Bagel都係個好選擇！部分本地小店重會供應冷凍Bagel，保存期長、肚餓時加熱就食得。而且口味變化多，夾餡亦從麻糬到水果乳酪等應有盡有啊。

人氣Bagel麵包店享樂烘焙

講到高CP值Bagel不得不提嘅手工麵包店，由一對情侶主理，標榜使用全天然牛油同不含麵包改良劑。Bagel加入湯種製作，特別煙韌彈牙，特濃抹茶麻薯同手工芋泥呢兩款口味最多好評。Bagel常溫可保存一日，放3-5度雪櫃可保存三日，密封零下冷凍可保存三個禮拜！

大圍創意烘焙店 Dear Coffee & Bakery

大圍呢間主打精品咖啡同自家製麵包嘅Cafe，每個月都會有唔同款式嘅麵包，當中會有一款係水果乳酪夾心Bagel！之前就出過抹茶草莓乳酪夾心貝果、桂花烏龍乳酪蜜柑夾心貝果等，「萌斷面（萌え断）」打卡一流。手工製作麵包數量有限，可以先上網站預訂。

多款鹹甜口味Bagel Bforbagel by 404 LOT FINE

由網店起家，舊年進駐到旺角開Cafe嘅Bagel店，Bagel經過低溫發酵24小時、不加任何防腐劑。而且有多款口味，甜嘅有招牌抹茶奶酥麻糬、奶醬多麻糬，鹹嘅亦有韓式辣醬豚肉等。同樣可上網站訂購，放3-5度雪櫃可保存七日，零下冷凍可保存一個月唷。

全素手工Bagel 404 Plant

同樣由網店開始，呢間主打純素Bagel嘅小店喺上環同康城都有分店，每日推出多款新鮮製作嘅Bagel。私心推介焦糖餅乾同玄米茶麻糬口味，前者香甜但唔膩，後者選用台灣茶粉味道清新、加埋軟糯麻糬無得輸。如有需要預訂可以DM佢地Instagram。

酒店級紐約式Bagel Schragels

香港首間紐約式Bagel專賣店，外脆內扎實、特別有嚼勁。每日新鮮製作，主要係供應畀各大酒店同餐廳，包括半島酒店同文華東方酒店！中環店有供應Bagel三文治，如果係儲糧亦有多款無餡Bagel同Cream Cheese，亦可以上網站訂購唔同Set。

西營盤歐式麵包店 Miam Bakery

主打手工歐式麵包嘅小店，各款麵包每日喺舖頭新鮮出爐，最多人推介嘅係佢哋嘅肉桂卷同酸種麵包，其實Bagel都值得一試啊！每日會有鹹甜口味各一，例如撰文當日就有藍莓忌廉芝士同烤蔥蒜鹽芝麻呢兩款，口感扎實有咬口。

冷凍Superfood Bagel Blendit

太子呢間小店主打健康食品同自家Bagel，唔難想象佢哋亦有一系列加入Superfood製作嘅Bagel！由少見嘅辣木葉粉到常見嘅日本抹茶、黑芝麻等，亦有紐約式Bagel常見嘅Everything、肉桂提子乾等口味。門市逢星期一、二、五有新鮮Bagel，或到網站訂購冷凍版。

文：Cathy.H