對於食肉獸嚟講係好消息：又多一間抵食扒房出現！旺角呢間新店主打用火山石燒牛扒，用自動售票機揀啱心水牛肉部位同分量，最平$78有交易！而且沙律、湯、白飯唔洗額外畀錢一律任食，非常抵食呀。
 

牛極同其他最近大熱嘅自助燒牛扒店差唔多，入座前要先去自動售票機揀牛扒部位同分量，畀錢同安排入座後就可以先去自助吧，自助吧有沙律同兩款沙律醬、麵豉湯、白飯同檸檬水，都係任食任飲呀。
 

牛扒會由師傅煎至約一成熟，再放到烘熱至攝氏300度嘅火山石板上面。聞起嚟香味十足，原來師傅煎牛扒時會加自家製和牛牛油，難怪肉味特別香濃！店家建議大家每次切一小塊牛扒放喺熱石上面，按自己喜好燒至理想熟度。如果覺得石板唔夠熱，可以請店員更換㗎。
 

牛肩肉眼（$118/300g）

牛肩肉眼係最平嘅部位，$78有180g，女士們應該都夠食，男士們就可以考慮300g或者400g喇。牛肩肉眼特點係雖然中間有一條筋，但勝在油脂唔算多而且分佈平均，肉味香濃。食起嚟的確有筋，可以自己煎至約半熟，筋位煎得脆口啲更易咬。肉質富彈性。
 

牛肋骨扒（$98/200g）

牛肋骨扒顧名思義係帶骨嘅，就咁記好似其他無骨嘅抵食啲，但牛骨附近嘅肉零舍香口吖嘛！呢間店嘅師傅仲相當花心思，特別原條牛肋骨買返嚟自己剪，做到每件得一條骨而且係厚切。
 

牛肋骨扒煎香後外脆內嫩，牛肉香味相當突出！其他部位仲包括脂肪較少嘅紐西蘭牛柳，同鮮嫩而口感豐富嘅西冷。
 

 

日本和牛（$248/300g）

如果想食到入口即溶口感嘅話，就要揀最貴嘅日本和牛啦！選用鹿兒島黑毛A4和牛，呢一期用緊牛肩里脊呢個部位，口感嫩得嚟又有彈性。
 

因為和牛油花比較多，食落的確比另外兩款更有入口即溶感。略嫌筋位多咗啲，不過油香同肉香都唔錯，配搭白飯一齊食就最啱。牛扒本身有落少少天然海鹽同黑椒調味，亦可以自己再加少少蒜蓉蘸醬或者自家製燒肉汁，前者微辣富蒜香，後者甜鹹惹味。
 

牛極
地址：旺角通菜街78號地舖

文、相、片：Cathy