又到大家最期待嘅自助餐啦！呢個暑假嘅自助餐好多選擇呀，如泰國主題、頂級牛排自助晚餐、榴槤海鮮主題，以及「蠔」食海鮮菇菌盛宴自助晚餐，總有一間啱心意～

「Amazing Thailand」主題自助晚餐 The Food Gallery  

全新泰國風情盛宴，所有美食均嚴格遵循傳統食譜，採用新鮮同正宗嘅食材精心烹制，打造一場正宗泰式美食風味之旅。菜式種類豐富，包括椰香綠咖喱波士頓龍蝦、泰式炸皮蛋、泰式烤豬腩肉、海鮮木瓜沙律、冬蔭功湯等；椰香綠咖喱波士頓龍蝦香濃又唔會蓋過龍蝦嘅鮮甜，而炸皮蛋都好惹味！甜品有椰奶燕菜糕、泰式布丁以及芒果糯米飯，食完好似去咗一次泰國咁。

供應時間: 即日起至2024年8月31日，晚上6時至10時

頂級牛排自助晚餐 馬哥孛羅咖啡廳  

鍾意食肉嘅唔可以錯過呢個頂級牛排自助晚餐，包括重量級斧頭扒以及各款上等肉眼扒等；斧頭扒肉味濃郁又軟腍，邊位有陣陣油香，好出色！另有德國薯仔牛肉沙律、印尼式燴牛尾，當然唔少得時令冰凍海鮮同甜品，無論你咩口味都啱食～

供應時間: 即日起至2024年8月31日，晚上6時30分至10時

海味之珍，果香之尊自助晚餐 倚窗閣

呢個自助餐以果王榴槤同海鮮作主題，必食推介包括泰式青木瓜鮮蠔沙律，酸酸甜甜好開胃；日式炸蠔配海膽蛋黃汁好香口，炸蠔加上海膽蛋黃汁層次豐富；鮮蠔蟹肉味噌飯簡直係鮮上加鮮。甜品就必食榴槤芝士撻、榴槤芝士蛋糕同榴槤香芒卷，榴槤控唔可以錯過呀。另外仲有供應即開生蠔、和牛面頰、雜錦刺身、芒果拿破崙以及多達9款Mövenpick雪糕等。

供應時間: 即日起至2024年8月31日，晚上6時至9時30分

「蠔」食海鮮菇菌盛宴自助晚餐 歷山餐廳

除咗海鮮專區可以任食，呢個自助餐仲有多款特色熱食同熱帶鮮果主題甜品，超豐富！海鮮區包括即開生蠔、鱈場蟹腳，刺身則有黃鰭吞拿魚、帶子、紅蝦等～特色熱食推介鴨肝野菌鮮雞威靈頓，外層酥脆，內裡係嫩滑多汁嘅鮮雞肉、細緻柔滑嘅鴨肝同雜菌碎；仲有香煎鴨肝、黑松露芝士龍蝦貝殼粉等都值得一試。另外奉送每位客人芝士焗珍寶蠔一隻，蠔肉鮮嫩多汁，濃稠芝士醬汁加上鹹香脆煙肉，入口綿密香濃。

供應時間: 即日起至2024年10月1日，晚上6時30分至9時30分

文：Yanica
編：Cathy