喺開中環搵食嘅朋友應該都對呢間已經開業十五年嘅人氣意大利餐廳唔陌生，最近餐廳請咗意籍大廚 Alessandro Tonin擔任行政總廚， Alessandro Tonin係土生土長嘅米蘭人，曾於意大利多個城市當廚，亦先後於東京、倫敦、上海等城市工作，特別擅長烹調地中海海鮮菜式。今次亦為餐廳設計咗全新Menu，包括超巨型嘅海鮮盤及斧頭扒等，啱晒一眾海鮮控及食肉獸。
炭烤精選海鮮拼盤($888)
海鮮拼盤集合多款海鮮，包括烤龍蝦、螯蝦、北海道帶子、大西洋蝦及魷魚仔，每款海鮮都烤得啱啱好，睇得出大廚功架！烤龍蝦超大隻，肉質鮮甜，仲好多蝦膏。而且呢個海鮮拼盤夠晒巨型，最啱就係同朋友分享！
澳洲穀飼帶骨和牛斧頭扒
牛魔王心心眼未呢？呢個斧頭扒用咗西班牙國寶級烤爐 Josper Grill烤製，加入新鮮迷迭香、黑胡椒粒等，肉質烤至微微粉紅色，入口充滿炭香。而且份量一樣咁巨型！
西西里紅蝦配自家製幼意粉($328)
傳統大蝦意粉嘅升級版，選用西西里紅蝦，蝦味好重！而自家製幼意粉亦充滿蛋香，吸收晒紅蝦鮮味，入口有甘濃蝦香。
Campagnola 薄餅($198)
薄餅即叫即烤，Campagnola 薄餅加入薯仔、意式煙肉、迷迭香及水牛芝士，材料簡單，但味道鹹香有驚喜。
炭烤巨型八爪魚鬚($268)
經典地中海菜式，八爪魚口感軟腍，配上紅燈籠椒醬就更惹味。
地址: 中環港景街1號國際金融中心2樓2075號舖
文、相、片: Yanica
