上個月嘅疫情似乎有緩和嘅跡象，好多人都出返晒嚟食嘢，唔少餐廳嘅生意都好咗。而觀乎大家嘅消費意欲，似乎以「打卡café」同「旅行國」嘅餐廳最受歡迎。
第10位 素年（*新上榜）
圖：素食餐廳嘅market愈嚟愈大，用植物肉代替真牛肉製作漢堡，亦都愈嚟愈普遍。今次呢間餐廳嘅素漢堡，除咗用Impossible™ Meat外，仲有自家製素芝士、洋蔥等等，不過，最最最重要嘅話題性主角，應該係雙層新鮮芫荽！！味道相當突出，鍾意嘅朋友應該會好開心。
第9位 虎鐵鐵板燒（*新上榜） 
圖：去少咗旅行，慳多咗錢用嚟食好嘢都好合理。呢間鐵板燒嘅食材有9成都係由日本空運到港，單係前菜海膽松露蒸蛋就已經令人眼前一亮，賣相精緻，面頭仲有金箔！雞蛋蒸至半熟，連埋海膽同松露一啖入口，喺濃濃香味中依然滲出蛋香。
訂座優惠：8折優惠
第8位 魚事者（*新上榜）
圖：炮台山唔算係飯局嘅熱點，但呢間小店能夠突圍而出，絕對有其過人之處。多款小食同麵食，都加入魚肉製作，好似薯條咁就變咗炸魚肉條，煙煙韌韌，香口又有鮮味。脆口嘅Nachos亦變成魚皮脆脆，意大利飯則變成魚肉粒粒，好有新鮮感，難怪吸引到一眾捧場客。
第7位 白房子（*新上榜） 
圖：本身開喺荃灣嘅打卡café，搬到去銅鑼灣後人氣一樣冇減。舖面嘅花花牆絕對係一眾女生輪流打卡嘅熱點，夠晒fancy。打卡最啱就係叫埋個曲奇杯，將牛奶倒落個杯度，玩埋boomerang效果一流，飲晒牛奶之後，記住隻曲奇杯都食得架。
圖：嚟呢間餐廳記得早啲訂定位，要揀窗邊呀，因為無論係日落景定夜景都好靚呢。肉食獸必食美國特級安格斯塾成肉眼扒，餐廳自設熟成肉櫃，肉質幼嫩多汁，而且仲係由前星級酒店嘅行政總廚主理，水準當然有保證。
訂座優惠：正價7折
訂座感謝祭 $20快閃優惠：熟成西冷牛扒
第5位 Non Kitchen
圖：呢間餐廳同樣都係有酒店級數嘅大廚助陣，炭烤牛扒有燒得好靚嘅格格網紋，食落又有陣陣炭燒香，肉味濃郁，牛魔王唔能夠錯過。加上餐廳情調不錯，天花上掛上一串串星星嘅吊飾，無論係情侶定閨蜜嚟都好啱呀。
第4位 Boholic
圖：作為吸引一眾女生同文青去打卡嘅café，純白牆不可缺少，仲要加多張籐製吊椅同幾個打卡corner，走波希米亞風嘅呢間餐廳，絕對有潛力贏在起跑線上。加上又可以打破「打卡餐廳啲嘢通常唔好食」嘅「傳統」，要入十強冇難度。推介香煎慢煮牛腹肉配紅酒黑醋汁，脂肪少而肉味濃。
第3位 燈籠滷味（*新上榜）
圖：可能大家都好耐冇去台灣，好掛住台灣嘅夜巿。呢間由師大夜巿開到過嚟嘅人氣滷味店，今個月打入三甲。最推介當然係師大人氣組合，包括甜不辣、豬肉片、花枝丸、白蘿白等，仲有好台灣嘅王子麵！滷汁用上台灣總店嘅祖傳滷湯，啖啖都係台灣嘅味道啊。
第2位 Homeland（*新上榜）
圖：呢間大埔街坊好熟悉嘅小店，開左半年左右最近去埋大角咀開分店，新店仲迅速上榜，實力不容置疑。佢哋自家製嘅手打意粉固然受歡迎，新店仲有限定菜式，外脆內嫩嘅德國鹹豬手，同用話梅蜂蜜酒製作嘅啤酒酸全雞，不論係賣相定味道都試得過。
第1位 Café Crêpe（*新上榜）
圖：今期榜首係嚟自加拿大過江龍嘅法式薄餅店，店內提供大約28款法式薄餅，有鹹有甜，其中蒙地卡羅朱古力法式薄餅同抹茶忌廉芝士配新鮮紅莓醬都係新店限定呢，前者用朱古力味香濃，後者酸甜有層次。
文：Kar
