Hello Kitty粉絲，有個好消息要話你哋聽呀~ 有甜品屋同Sanrio合作，打造咗兩間Hello Kitty復刻甜品屋呀，一間喺銅鑼灣，一間喺西貢，除咗有好多Kitty甜品食之外，仲有靚靚打卡位同埋懷舊精品可以買走呀。

最吸睛嘅非雜果涼粉西瓜盅莫屬啦~ 成半個西瓜上再放咗啲西瓜波波、蜜瓜波波同涼粉等等，細心啲睇仲會發現到Kitty芒果！So cute！咁多生果，夠晒解渴啦。

另一樣消暑聖物應該係Hello Kitty香蕉船啦，3大球雪糕啊！

蘋果杞子燉桃膠，係原個蘋果上呀，唔好以為淨係得插住嗰個kitty牌，打開蘋果蓋有驚喜呀！入面挖空咗個蘋果，載滿香甜嘅杞子燉桃膠，仲有個Kitty頭呀，桃膠有得添飲~

芒果桃膠雪蛤膏椰汁味幾香，桃膠爽口，但最過癮都係側邊兩粒Hello Kitty芒果！

仲有芒果嘢！係椰汁芒果河粉，連埋芒果汁同芒果肉一齊食，都幾爽。

呢架Kitty小巴脆多士又幾盞鬼，腸仔扮車轆，烘底多士夾住嘅係粟米蛋沙律。

焗蘋果西米布甸面頭舖滿厚切蘋果片，入面係綿綿嘅蘋果蓉加西米布甸，賣相唔錯。遲下冬天食（好似有排）應該幾啱。

另外仲有椰汁芒果糯米飯同幾杯懷舊特飲，好似雪糕椰汁紅豆冰呀、雪糕菠蘿冰呀等等。熱飲都有嘅，蘋果玫瑰烏龍同桂花烏龍薑茶，杯蓋仲要扣住Kitty個蝴蝶結㗎。

同場仲有啲懷舊造型嘅精品賣，例如瓷碗、搪瓷杯之類，Kitty粉記得帶定多啲錢先好去呀。

期間限定：8月8日 至 2019年1月6日

Honeymoon Dessert De Avenue
地址：銅鑼灣軒尼詩道500號希慎廣場3樓317-319號舖

滿記甜品
地址：西貢普通道10號A,B,C地下

文、相：Kar