幾時都好多人鍾意食M記，嚟緊可能仲多人~ 因為佢哋嘅The Signature Collection即將又有新包要推出喇，最鍾意試新嘢嘅香港人，仲唔又走去排隊咩。仲要今次呢個都幾吸引——手撕雞安格斯。
睇個名就知，主要材料係手撕雞同安格斯啦，由星級廚師Christian Yang （楊尚友）創作。Christian表示佢去法國留學嗰陣，見到當地有好多燒雞舖，有一隻隻燒雞掛住喺度轉，啲香味傳到幾條街都聞到，於是今次研製一個法式口味嘅新包時，就用秘製肉汁風味醬加入手撕雞肉，再夾多塊130g重嘅100%安格斯牛肉漢堡，加埋香烤蘑菇、紫椰菜、軟滑白芝士同埋香辣洋蔥醬落去，無論視覺效果定口感都相當豐富。
所選嘅麵包亦較日常食到嘅偏軟同埋淡味，令到餡料嘅味道更容易突出。牛肉厚得嚟都juicy嘅，唔會太乾，至於手撕雞嘅味相對就冇咁顯，但連埋辣辣地個醬食好惹味。同埋今次搭紫椰菜都幾有新鮮感，清新爽口，咬落去個包唔會成口肉嘅感覺。
供應日期：4月26日起
另外，忠粉應該都會知道呢期有黑松露醬薯條食啦，一盒薯條上面，淋上黑松露醬同酸甜燒烤醬，係香口嘅。話飽話飽，不過結果都好易食下一條食下一條咁又清晒，叫餐加$7.5就有，仲有埋杯好fresh嘅柚子特飲添。
文、相：Kar