我相信每個人都有一顆「麻甩的心」，鍾意到大排檔食鑊氣十足嘅小炒，再加一支大啤，真係爽，但令人汗流浹背嘅夏天讓不少食家卻步。喂，開飯仔有好介紹喎，大排檔格局，食嘢夠鑊氣之餘，仲幾有花臣，而且仲係有！冷！氣！各位麻甩們，有無興趣？

呢間開喺巷子裏嘅新餐廳，無論裝修、餐牌、海報等等都走大排檔style，麻甩又貼地，供應嘅食物都好有港式風味，尤其是呢碗港式邪惡始祖──楚撚豬油撈飯($15/碗)。齋睇似乎無乜餸，但呢碗飯卻令不少60後、70後再三回味。一碗白飯，跟送豬油、豉油、芫荽及蔥花4款配料，餐廳更特別以砵仔盛載白飯，更有風味。

客人可隨個人喜好加入配料，將配料與白飯撈勻之後就食得。原本乾身嘅飯粒沾上奶白色嘅豬油，加上甚有嚼頭嘅泰國米飯，一邊咀嚼，一邊滲出油香，令整個口腔充滿豬油香，好味！

呢款較為新派嘅酥炸黑松露菌醬芝心乒乓牛丸($78)，師傅以本地鮮牛肉入饌，將牛肉切條、切粒、剁成肉餅，並撻至起膠再油炸而成。自家唧製嘅粒粒牛丸，比起一般牛丸大粒啲，牛味亦較濃郁，彈牙非常。

內裏有半融嘅黑松露巴馬臣芝士，能否成功拉絲就睇各位食客嘅功力喇！不過「爆芝」容易燙傷嘴巴，難怪餐廳附設「小心爆漿」字牌啦，各位小心啲！

相信大家都食過咕嚕肉，但有無見過呢款咁有造型嘅菠蘿拔絲咕嚕肉($68)呢？以糖霜做出拔絲效果，形成呢個千絲萬縷嘅鳥巢。以咕嚕肉先炸後炒，再加入糖醋汁而成，口感帶點酥脆，味道卻酸酸甜甜，好清新。大廚特別選用梅頭部分，肉質較為軟腍，與外層嘅脆皮形成對比。

大排檔嘅特色，就係既有鑊氣小炒，又有綿滑粥品。餐廳提供幾款以砂鍋盛載嘅鍋仔粥，開飯仔推介惹味鮮泥鯭粥($88/細、$12/大)，一窩入面起碼有2-3條泥鯭、皮蛋、腐竹等材料，而且白粥煮得好綿密，仲有微微嘅魚鮮。旁邊有油炸鬼、炸欖菜、芫荽及蔥花作調味。另有田雞粥、滑雞粥等。

（左）豉汁豬膶蒸排骨相當classic，雖然只用豉汁、豉油調味，但上碟後，廚師最後會用滾油灒一下，令菜式更多一層油香，口感更豐富。開飯仔強烈建議，一定要加陳村粉底，口感滑溜嘅陳村粉沾上惹味豉汁，味道一流，價錢為$83。而（右）楚撚記原隻脆皮炸豬手，外皮炸至脆卜卜，內裏豬手依然嫩滑，而且炸得不致太乾身，價錢為$94。

鹹蛋黃呢排咁受歡迎，餐廳亦有供應呢款帶點新加坡風味嘅（左）燕麥金沙蝦球($82)，將緬甸虎蝦炒成蝦球，並加入鹹蛋黃碎炒成金沙蝦球，最後面層灑上混合咗嘅粗、幼燕麥片。燕麥有粗幼，口感香脆又煙韌，而且不太油膩。而另一款（右）家鄉五柳炸蛋($58)，五柳即指紅蘿蔔、青瓜、酸蕎頭、青木瓜及薑，將五柳切絲再用醋等醃漬5日，而醬汁係用茄汁、白醋、片糖、山楂、梅子煮成酸甜汁，係一道清新開胃嘅菜式。

飲品方面亦見特色，餐廳特別與本地麥氏釀酒廠合作，推出自家品牌手工啤，以龍眼、桂圓釀製，口味比較清新，麥味偏淡，好啱女生。當然仲要配埋啤酒專用嘅戰鬥碗，飲起嚟更開心，價錢為$42/支。

楚撚記大排檔
地址：土瓜灣馬頭圍道187號地下2,4號舖

文：Joy