嚟自紐約嘅人氣漢堡店，繼早前登陸中環IFC之後，即將又會喺隔籬站，金鐘開多間分店啦~新分店除咗有招牌嘅幾款漢堡，仲有幾款新口味嘅concretes同holiday shakes。

呢幾個包大家應該唔會陌生啦，ShackBurger、Chick’n Shack同Shroom Burger上次都同大家介紹過，前兩者都係用100%全天然嘅安格斯牛肉、雞肉漢堡，夾埋自家秘製ShackSauce，肉味香而且仲幾juicy，至於後者就係脆炸意式大啡菇，咬開仲要有流心芝士！

而呢個Smoke Shack，聽個名就知係煙燻嘢。原來係用咗美國全天然蘋果木煙熏煙肉，另外有櫻桃辣椒粒、自家秘製ShackSauce，食落又係另一番風味，整體嘅香味好重，鹹鹹香香好惹味。

Concretes呢樣甜品本身中環店都有，但呢幾隻味就係呢間店先獨有嘅。三隻味分別係綠茶（Matcha Golden Bell）、芝麻（Open Sesame）同朱古力（Queensway Crunch）。呀，concrete即係frozen custard啲friend。講定先，要影相打卡嘅，快手，融得好快。今次呢三隻味各有特色，抹茶控例牌會揀返綠茶嗰隻啦，有綠茶棉花糖喺入面，但食食下仲食到啲辣？係蜜餞薑糖呀。

黑麻麻嗰杯係芝麻，靈感係嚟自中式芝麻湯丸。食落嘅味都真係幾似㗎科科，特別係嗰啲糯米丸子，好能夠發揮佢煙煙韌韌嘅作用。另外啲朱古力粒，就係由本地一間bean-to-bar朱古力製造商Hakawa做嘅，同芝麻各有濃香但又唔會互搶風頭，唔怕肥嘅話呢杯真心好食。

而朱古力味嗰隻就加入咗公平貿易嘅腰果糖，同焦糖咖啡。三杯嚟講，呢杯最甜最heavy，自認係甜魔嗰啲就啱晒。

三杯holiday shakes雖然都係新產品，但就兩間分店都飲得到。榛子、聖誕曲奇、薄荷朱古力，都係frozen custard底，面唧鮮忌廉，再灑上朱古力針呀、烤榛子等等。

是咪已經好心急呢？特別係金鐘返工嘅朋友仔，食晏又多個選擇。等多一個禮拜啦，下星期三，11月21號就會正式開業啦~

Shake Shack
地址：金鐘金鐘道88號太古廣場一期1樓105A號舖

文：Kar
相、片：Tom Li