新年嘅時候，好多人都會去離島行個大運兼飲飲食食，而長洲、南丫島同愉景灣都係熱門地點。帶住一夥旅遊嘅心出發，總會想食得盡情啲，但好容易因為咁攝取多咗鹽同糖，反而得不償失。以下3間參加咗少鹽少糖食店計劃嘅離島餐廳，都有美味嘅少鹽少糖菜式畀大家揀，即刻bookmark定，到時就唔使就住就住咁食啦。

艾堡餐廳（長洲）

西式大蝦鮮果沙律

平時食開胃菜，好多時都會揀沙律。呢道西式大蝦鮮果沙律因為有菠蘿、火龍果、奇異果、西瓜等多款鮮果，本身已經好清甜，唔需要落鹽同糖，配埋大蝦一齊食就夠晒爽口健康。

蒜蓉炒雜菜

想食熱盤亦有蒜蓉炒雜菜可以揀。師傅先爆香蒜蓉，再炒椰菜、西蘭花、椰菜花同甘筍，令食材沾上蒜香，然後加一茶匙豉油，吊起蔬菜天然嘅甜味，無需額外落鹽同糖都色香味俱全。

水門雞湯粉

大大份嘅水門雞湯粉湯底清甜，皆因用咗新鮮蔬菜、白蘿蔔同雞骨熬煮3個鐘，以蔬菜天然嘅甜味取代糖，再落半茶匙豉油提味，唔落鹽糖都能突出雞肉嘅鮮香味道。

星浪餐廳（南丫島）

芝士焗椰菜花

見到芝士焗，咪以為一定好heavy，因為餐廳特別提供製作無加添鹽同糖嘅版本畀大家。將花椰菜拌勻忌廉，再喺面頭鋪上本身微鹹嘅芝士一齊焗，令鹹味滲入花椰菜，又唔會太乾身。而且蔬菜本身就有天然甜味，當小食咁開心share都唔錯。

鐵板牛油大蝦

自帶海水鹹味嘅海蝦，無需額外加鹽都好夠味，煮嘅時候落埋無添加鹽嘅牛油同迷迭香，可以令菜式增添香氣。食之前唧少少檸檬汁，味道層次會更豐富。

鐵板火焰燒魚

當造嘅紅魚烤起嚟鮮甜味突出，減少1/3鹽後，加白酒同黑胡椒有助去除魚腥味外，同時增加味道層次。淋埋以香草、番茄等天然食材製作嘅醬汁，令魚肉更香甜可口。

牡丹軒中菜廳（愉景灣）

阿拉斯加蟹柳粉絲煲

將中式烹調技巧運用得宜，少鹽少糖都一樣煮到鮮味十足嘅佳餚。好似呢個粉絲煲選用新鮮阿拉斯加蟹，肉質鮮甜又帶有海水嘅鹹味，落少3/4鹽反而更品嚐到食材原味。拆出蟹肉，再配搭芽菜同唐芹一齊煲，令粉絲吸收埋海鮮嘅鮮味同蔬菜嘅天然甜味，唔落糖都風味十足；食嘅時候撈勻大量蟹籽會更爽口。

金湯白玉星斑球

星斑柳本身鮮味十足，減少3/5鹽都足以提鮮；而用南瓜製成幼滑嘅湯汁，再配上juicy嘅白蘿蔔，以濃郁嘅天然蔬果甜味完全取代糖，讓食客更能品嚐食材嘅原味。

野菌釀北海道南瓜盅

呢道菜啱晒鍾意食得清啲嘅朋友！喺原個北海道南瓜內加入鮮雜菌、甘筍、松子、西蘭花同蘆筍一齊燉煮，逼出多款蔬菜嘅天然甜味，而家減少3/5鹽重更加香甜𠻹。