綠色素食份子 (已結業)

朋友之前介紹過呢間餐廳，話唔錯所以我地就去食。一入到去感到餐廳設計簡約，光線充足，俾人一種好舒服嘅感覺。服務員態度非常好，即使落單嘅時候三心兩意，但係仍然好有耐性咁幫我地落單，又推介唔同嘅菜式俾我地。首先有個餐湯。餐湯係甘筍粟米湯。個湯好甜，有啲似南瓜湯嗰種質感。味道唔錯。第二要介紹嘅係啲前菜。有雲耳，麻醬豆腐同車厘茄。啲雲耳嘅醬係酸酸的，非常開胃。麻醬豆腐嘅豆腐好軟，啲醬同個豆腐好夾。車里茄最特別，因為佢用咗桂花糖水嚟當汁咁點，所以就算車厘茄幾酸都好，都會有啲糖水嚟中和返。桂花味好清香，大大提高食慾。然後就到主菜。主菜有茄汁芝士焗牛肉飯同雜菜咖哩。首先講下牛肉飯，個飯嘅配菜- 青椒，黃椒同紅椒能將個飯嘅味道大大顯咗出嚟，同時又唔會蓋過啲茄汁味。個人認為係一個唔錯嘅配搭。啲牛肉又唔會太難咬，証明焗嘅時間適中。跟著就係雜菜咖哩。個人認為個咖哩太辣（即使係小辣都已經好辣）。啲菜就一般啦，朋友話啲菜有啲老，特別係啲豆。套餐仲包一杯豆漿or蘋果醋，十分抵！總括而言，呢間餐廳真係值得推介，無論環境定嘢食，都贏盡口碑，實在不能不試。