燒味滷師 (成城大廈)

營業中

休息中

行過見到好多人排隊，於是就斬啲料返去同同事一齊食。冇諗過價錢咁實惠都咁大碟咁好食。 至尊燒鵝（上庄）$110 皮脆肉嫩，真係只可以用呢四個字形容，又夠juice又夠油香。本來以為咁平嘅燒鵝層皮會唔脆，結果係我錯，超級脆。叉燒（半斤）$40 唔肥，但係又好滑，又唔會鞋烚烚。調味都好好，唔會過甜或者過鹹。應該同師傅講要厚切，咁樣會更加滋味。客家鹽焗雞（半隻）$25見到咁平順便買半隻試吓，肉質非常嫩滑，唔會死鹹，好入味。泰式鳳爪拼海蜇$42啱晒夏天食，爽口過癮，調味都非常好。

屋企附近最近新開咗間燒味舖，有唔少街坊幫襯，今日懶得煮，索性斬幾味加餸，返去焯碟菜心就開得飯。燒味價錢合理，新開張仲有唔少優惠，特別係燒味飯盒，無論單雙拼都係一口價廿二蚊，非常抵食。大熱天時見到海蜇拼泰式鳳爪零舍吸引，海蜇口感清爽彈牙，鳳爪亦同樣爽口，去咗骨一啖一隻剛剛好，酸辣開胃。先生至愛食燒鵝，見咁耐冇食，揀咗下莊，果然冇令人失望，鵝髀大大隻，夠哂肥美，肉質非常嫩滑，連皮咬落去，滿口鵝油香氣，令人回味！除咗酸梅醬之外，仲有一袋仔燒鵝汁，原汁原味，無論淋上燒鵝到食抑或係撈飯都一流！客家鹽焗雞大件夾抵食，肉質滑溜而且夠哂鹹香，絕對係白飯殺手。叉燒半肥瘦，一打開外賣盒已經香氣四溢，色澤鮮明，入口肉質軟腍，蜜汁亦夠香夠入味，水準唔錯。燒味店食物水準唔錯，特別係燒鵝，隻燒鵝髀簡直令人回味，鍾意食燒鵝嘅絕對唔能夠錯過，而且燒味價錢夠晒親民，最值得一讚嘅係店面乾淨整潔，俾人嘅感覺非常衛生，難怪咁多街坊客捧場，希望能夠一直保持水準，等我哋可以繼續食到優質嘅燒味。