Made in HK Restaurant (已結業)

向APM行到攰想揾個地方坐下順便食下嘢， 就嚟到Made In HK Restaurant， 入去睇下menu有乜嘢食， 最後揀咗一個HK Style High Tea Set (2人用) $178加一，Tea set入面有玉桂多士，紅豆椰汁糕，焦糖燉蛋，叉燒酥，炸雞翼，肉醬焗薯皮，夏威夷薄餅，迷你熱狗，再包兩杯飲品。 玉桂多士比較硬身同埋凍咗。紅豆椰汁糕幾好味， 好香椰汁味。焦糖燉蛋亦都唔錯， 燉蛋好滑。叉燒酥唔好食， 完全食唔到叉燒酥嘅味。炸雞翼夠脆皮，唔錯。肉醬焗薯皮 & 夏威夷薄餅，黎到已經凍冰冰。迷你熱狗還可以啦，味道普通。總括嚟講high tea set做得麻麻地， 如果佢送嚟嘅食物可以保持返個溫度會比較好， 至於甜品嗰一part都可以接受！餐廳環境坐得都幾舒服， 店員服務普通！

由於好朋友話有啲超限量珍藏嘅禮物有兩份，佢話送一份畀我同我開心share，所以我們約咗今日下午喺觀塘apm嘅「Made in HK Restaurant」食下午茶！我們叫咗個特餐：瑞士汁鷄槌湯意粉配農場鷄蛋多士嘅湯碗比較大，同埋湯亦比較多，攪到睇落覺得份量好似好少，其實都算大碗，而意粉嘅麵質都幾煙韌彈牙，鷄槌嘅肉質都幾軟滑，瑞士汁嘅味道相當入味，就算浸著喺湯度，味道都一樣咁惹味，至於鷄蛋就可以有煎蛋、炒蛋或轉做烚蛋，而我們就揀咗烚蛋！港味三層下午茶：玉桂多士、紅豆椰汁糕、焦糖燉蛋、叉燒酥、炸鷄翼、肉醬焗薯皮、夏威夷薄餅同迷你熱狗，味道就不過不失，但就唔係想像之中咁好，因迷你熱狗嘅包質比較乾身同「粗嚡」，至於賣相方面，雖然係用個英式下午茶嘅鐵架嚟盛載著，但食物就係港式嘅食物，感覺都幾特別，而且款式種類都算幾多！