村爺爺龍蝦湯.泡飯.燉湯專家

營業中

休息中

晚飯時間好多人排隊食，我地又唔執輸排下試試。入到去叫咗幾款泡飯同小食。殿•海鮮龍蝦湯泡飯，見到有個殿字，應該都唔差，黎到有半隻龍蝦，湯底都有好多海鮮，蜆，扇貝，青口，魷魚，鮑魚等，個湯有濃濃嘅海鮮味，撈飯食好正！墨魚手指魚腐龍蝦湯泡飯，個墨魚手指同魚腐非常好食！必試嘅小食，本身炸得好香脆，點埋雞醬食好好味！而龍蝦亦好爽口新鮮，而且好多肉！鮮鯇魚片撈油麵，魚肉彈牙，如果唔想食濃味海鮮湯可試呢個，會較清淡。小食試咗生灼墨魚圈同炸蝦拼吉列蠔，都唔錯！整體唔貴又好味！

較早前係FB及IG度見到洗版式post龍蝦湯泡飯，後期又有「影帝黃秋生」大哥嘅極力推介，光是龍蝦海鮮的賣相已令人蠢蠢慾試了！趁著熱潮稍微退，呢日我倆來到油麻地嘅「村爺爺」一探究竟...呢間平民化小店，其賣點係以大眾化的價錢食到好西，包括其招牌海鮮龍蝦湯泡飯以及花膠螺頭雞煲翅燉湯等。我倆都唔執輸，即時一人嗌一碗龍蝦湯泡飯嚟食。殿。龍蝦湯泡飯：平30蚊嘅「極上」唔揀反而走去㨂「殿」，點解嘅？皆因「殿」款含有半隻龍蝦囉！作為龍蝦控嘅我倆，又豈能只吃龍蝦頭呢？果然無揀錯，龍蝦肉質十分彈牙爽口，隻龍蝦鉗又大隻，入囗啖啖滋味！其他海鮮都唔弱，扇貝肥大肉厚，墨魚仔又係king size，青口、花甲等多不勝數！唯獨湯汁較淡味，鮮甜欠奉，汁撈飯應該就麻麻嘞！好在我哋怕飽肚無揀飯，加咗4蚊及10蚊轉出前一丁及手打烏冬啫! 手打烏冬軟滑兼有彈力，食到舔舔脷呢！天啊每一碗嘅份量都好大，料多麵量也多，搞到差啲食唔落碟小食添🤪!炸蝦拼吉列蠔: 估唔到啲炸物同樣出色，吉列蠔炸得非常鬆脆，蠔肉嫩滑，剛好熟。炸蝦🍤脆身香囗，令人一試愛上！凍檸茶：凍檸茶大大杯，確係透心涼！價錢合理，抵唔抵食就見仁見智喇！

旺角不嬲都多野食，但以日式、台式、韓式居多，泡飯好似比較少見，所以今日就同朋友來試下啦~第一次食當然想揀招牌ge龍蝦湯泡飯，點知見到自選泡飯個餐牌，原來好似車仔麵咁多搭配，睇到頭都大埋。究竟點配先好味? 老闆好霸氣咁話: “我將d最夾ge食材配好哂啦, 除非你好堅持自己搭啦”。搭好左ge餐牌係呢個:既然你咁有自信，我信你啦！極上海鮮龍蝦湯泡飯，真係不得了，竟然有龍蝦頭，淨係打卡已經值得。雖然冇龍蝦肉，但個湯好鮮甜，最難得係飲完唔會覺得渴，證明冇咩味精，真材實料。呢個係今餐重點推薦!朋友A想食清淡d，老闆建議食魚腩木瓜豆腐湯飯。湯水煲到奶白色，好似家常老火湯咁，驟眼睇似屋企食飯撈湯咁。但愈平凡先難整得好食。魚完全冇腥味，木瓜帶出左魚ge清甜(結果朋友個湯俾我搶左好多......)朋友b就堅持要自己搭配，佢揀左豬骨湯底，加肥牛同蟲草花。以為風馬牛不相及，但飲落就好和諧，廚師你係得ge最後我地仲嗌左其他小食，炸蝦炸蠔、墨魚手指拼魚腐、南乳雞翼拼薯角etc......重點係，咁樣食法，每人都唔洗$100埋單!cp值實在太高, 強烈推薦!