點心到 (廟街)

營業中

休息中

同朋友喺佐敦見面，見到呢一間點心舖食評幾好就去試一試，我地1點半左右到，剛好食飯時間裏面已經滿咗，前面大約有兩組人，好好彩唔使排太耐，10分鐘左右就有位啦🤩.入面嘅環境比較迫，同隔籬枱好近。枱上面會有一啲透明膠嘅擋板等大家安心啲，但望到板上面有好多食物嘅汁跡，令我對佢地衛生清潔印象唔太好🫣。.金沙脆皮銀蘿腸 $28開頭睇到相會以為係炸兩黎，但原來係腸粉皮包住白蘿蔔絲春卷。黎到重係熱辣辣，裏面嘅春卷皮冇俾腸粉嘅蒸氣整到淋咗，依然脆卜卜，內涵好足料有滿滿嘅白蘿蔔餡，味道清甜。三重口感意外地夾，下次嚟都會再叫。原隻蝦燒賣(2粒) $15燒賣好大粒，上面有原隻飽滿嘅蝦🍤，賣相比平時嘅酒樓燒賣已經吸引得多。🦐蝦爽口唔霉，🐖豬肉唔會彈牙唔硬。最好既係有分兩粒同埋四粒選擇，兩個人嚟食剛剛好。燒汁釀虎皮椒 $24虎皮椒煎得啱啱好，有少少焦香味好食。不過唔太食得辣嘅朋友要留意，有機會抽中好辣既😂上海小籠包＄24 小籠包好扁外貌已經唔係好吸引😅 外皮質感唔會太厚，內陷肉味唔錯，但接近冇湯汁，唔推介。卡通流心芋蓉包 $22芋蓉包好cute, 外貌100分，芋蓉味好香，不過唔覺有流心效果🤔小失望。鮮蝦腐皮卷🦐

FD想飲燉湯，又想食蝦餃，咁encore返哩間一路都有幫襯返啲餐廳啦。今日天好凍，要食熱少少暖下身。哩間餐廳除了茶點，仲有飯可以叫，品種都算豐富。今日揀咗沙參玉竹燉土雞湯，蔥姜牛百葉，紅油抄手，燒汁釀虎皮椒， 晶瑩蝦餃皇（2粒）同豉汁蒸鳳爪。晶瑩蝦餃皇（2粒），蝦餃皇大大一粒，皮薄蝦新鮮，蝦食落好鮮甜彈牙，一粒已經好足夠。沙參玉竹燉土雞湯，用足功夫煲啲湯，睇到真係落足料。飲落雞味好重，藥材味好溫和，同雞好夾，飲完一盅身子暖返晒。蔥姜牛百葉，牛百葉係FD啲最愛，牛百葉份量算多，食落好彈牙，同埋薑蔥味好重，好食。豉汁蒸鳳爪哩個係每次飲茶必叫，鳳爪蒸得好軟糯，入口即化，鳳爪嗦晒啲豉汁醬，好味。燒汁釀虎皮椒，一份有4件，虎皮椒煎得啱啱好，食落好有鑊氣，又唔會好辣，掂，食完2件真係好飽！紅油抄手，一份有5件，抄手皮薄肉鮮，點埋辣油，一啖落去，辣油帶埋抄手啲鮮甜，真係好味。最後食完茶點，再飲杯熱茶，同FD吹下水，真係好享受。

老公今日要去佐敦做嘢，佢話可以陪我食個快lunch🤭即刻揀咗呢間，我見啲食評話上菜速度好快。入到去幾乎坐滿晒咁滯，都似係喺附近返工放lunch嘅人，一坐低我哋即刻點野食，呢度有啲兩件嘅點心可以揀，幾好喎，唔使兩個人食咁多，咁又可以試多幾樣🤭我哋total揀咗七樣嘢。晶瑩鮮蝦餃（兩件）原隻蝦燒賣（兩件）黑松露菜苗餃燒汁釀虎皮椒鮮竹牛肉球黑金流沙包上海小籠包真係上菜速度好快，我哋坐低叫嘢到埋單俾錢都係用咗40分鐘🙊好似未試過飲茶食點心可以咁快食完，平時好多都要等好耐，想講啲點心又唔似整定擺喺度㗎喎🤔因為上枱嘅時候仲出晒煙好熱，咁真係好高效率👍🏻食物質素OK，蝦餃同燒賣啲蝦都好彈牙，釀虎皮椒好味，少少辣同燒汁味道好夾，小籠包超多肉汁，好食👍🏻流沙包我覺得唔夠流沙，但味道就好食嘅，佢哋呢度茶介$3一位真係好平，我哋兩個人食咗七樣嘢先係150幾蚊，總括嚟講快靚正之選。

過嚟廟街就唔一定要食煲仔飯同蠔餅嘅，今日就試咗一間點心舖 - 點心到。點心款式都有唔少選擇。覺得特別嘅係有啲點心可以淨係嗌兩件，唔使要四件，可以食多幾樣😛。📍 原隻蝦燒賣(2粒) (💰$15) 📍 晶瑩鮮蝦餃(2粒) (💰$15) 飲茶一定唔少得蝦餃燒賣。蝦餃個皮都算薄，啲蝦新鮮爽口，燒賣啲肉亦都夠彈牙。📍 黑金流沙包 (💰$25) 店主推介嘅黑金流沙包，食嘅時候真係要小心啲，因為入邊啲流沙夠晒多，而且夠晒熱，正！📍 金沙脆皮銀蘿腸 (💰$26) 第一次食呢種腸粉，入邊包住啲好似米紙嘅脆脆，加埋嫩滑嘅腸粉，咁有對比嘅口感真係好過癮！📍 沙律明蝦角 (💰$28) 即叫即炸，香脆可口，推介推介！📍 黑松露菜苗餃 (💰$26) 非常足料嘅菜苗餃，加咗黑松露，感覺即刻唔同晒，好高級。📍 濃湯鮮竹卷 (💰$19) 濃湯浸住嘅鮮竹卷，皮薄餡靚，連埋個濃湯一齊食，滿足。📍 燒汁釀虎皮椒 (💰$24) 一碟四件，非常之大件，隻碟都爭啲載唔晒。而且唔會好油膩，入口感覺一流。📍 豉汁蒸鳳爪 (💰$20) 呢個價錢有四隻幾入味既鳳爪，性價比高。最後要特別指出，個辣椒油好正！夠香夠辣，就算唔食辣嘅朋友都推介你

位於佐敦廟街「點心到」估唔到比到我驚喜🤩除咗點心有驚喜，仲有其它食物都唔錯👍等我介紹今日點咗咩好嘢食先😋籠仔金銀蒜海蝦飯🦐 $40店員送上檯已經聞到超香🤤蒜蓉海蝦份量都多，吃落好香口，米飯軟硬適中啱啱好👍其實整體都夠味，所以附上甜豉油我地都落得好少😋燒汁釀虎皮椒 $23我至愛虎皮椒，釀魚肉非常厚，煎得又夠香😋晶瑩鮮蝦餃 $15原隻蝦燒賣 $15飲茶蝦餃燒賣必點，要讚吓哩度蝦肉係幾彈牙👍黑松露菜苗餃 $26哩個黑松露我覺得比較淡口，除了有菜苖仲有少少蝦肉，都算足料。醬皇金錢肚 $24金錢肚非常之腍又夠味，蘿蔔吸哂醬汁非常好味👍沙律明蝦角 $28大大粒脹卜卜炸到好香脆🍤蝦肉又大隻，雖然係炸但裡面蝦肉咬落好彈牙架😋鮮竹牛肉球 $19夠味又好大粒金沙脆皮銀蘿腸 $26即叫即整，所以腸粉都幾滑，裡面個油炸鬼好香脆，仲有蘿蔔絲，吃落口感非常豐富😋哩度茶位每人都係$3位點心又出色，價錢一啲都唔貴👍值得再來

呢個點心店食過幾點，水準十分穩定，所以每次經過都會黎食。食店坐位不多，但每次等五至十分鐘便可以入座。呢間餐廳既招牌菜係黑金流沙包、黑蒜排骨湯、金沙脆皮銀蘿腸粉，金銀蒜海蝦籠仔蒸飯。如果你係第一次黎，建議你可以點招牌菜。因為我食過幾次，所以今日主要叫其他點心試下。鮑汁鳳爪($28) - 鳳爪十分入味，最底會有好多好入味既花生，值得一試！薑蔥牛柏葉($24) - 味道唔錯，但係份量比較少，只有4舊，兩個人岩岩夠食!燒汁釀虎皮椒（$23)- 之前食燒汁釀茄子 ，覺得好食 ，燒汁釀虎皮椒質素都係咁好 。佢係即叫即整，熱度十分夠。                                          沙參玉竹燉土雞湯 (盅) ($36) - 盅內十分足料，湯味清甜，十分滋潤。凍奶茶($18) - 呢個餐廳最特別係除左茶外，仲可以另外點奶茶咖啡，味道正常！ 餐廳唔收加一，茶錢每位3元，所以十分抵食，大家都可以去試下！

黎佐敦揾FD，睇到哩間鋪頭食點心好似唔錯，咁試試。今日揀咗晶瑩鮮蝦餃，懷舊鵪鶉蛋燒麥，燒汁釀虎皮椒，紅油抄手，濃湯鮮竹卷，豉椒蒸排骨同濃湯杞子浸時蔬。點心喺即叫即蒸嘅，所以都要等耐少少。蝦餃可以叫2隻或者3隻，我地兩個人，當然叫2隻啦，咁可以試多幾款點心。蝦餃皮好薄，蝦好大一隻，食落好彈牙好鮮甜，同埋冇雪味，唔錯。燒汁釀虎皮椒煎得啱啱好，食落好香口。裡面啲鯪魚肉餡好彈牙，配啲醬汁有少少酸味，好夾。不過辣椒都有少少辣，我食就啱啱好，FD食就覺得辣咗D。紅油抄手好大一份，大大件抄手仲有5件，配上香醋同辣油一起食超好味。宜家出面好少可以食到鵪鶉蛋燒麥，可能哩件嘢整落都幾麻煩。鵪鶉蛋蒸得啱啱好，唔會太熟，食落入口即化，同燒賣都幾夾。豉椒蒸排骨都幾大一份，排骨有差唔多10件，排骨蒸得好幼滑，同埋好重蒜味。底下芋頭嗦哂醬汁，好粉好惹味，完全唔夠喉。濃湯鮮竹卷湯底好鮮甜，鮮枝竹嗦哂湯汁鮮甜味，每一啖都好滿足。菜心整得啱啱好，食落好脆，菜心加咗少少調味已經好夠味，唔需要太重調味cover咗D鮮甜味。最後買單唔哂加一，食到超飽都唔夠150HKD，勁抵LOL!

呢間點心專門店晚市都有得飲茶，仲有幾款店家特製點心，價錢算親民，茶芥$3一位。而且點心即叫即蒸，全部熱辣辣～正！卡通流心芋蓉包 $22 賣相幾Cute，食落餡唔算多但幾好味。晶瑩鮮蝦餃 $15/2粒，幾大隻，皮夠薄，唔錯。黑松露菜苗餃 $25 賣相都唔錯，但食落唔覺有松露味，而且皮比較煙韌，有點失望。原隻蝦燒賣 $15/2粒，幾大粒，口感唔錯。懷舊鵪鶉蛋燒賣 $24 普普通通無特別。燒汁釀虎皮椒 $22 青椒辣度有後勁，慢慢滲出黎，正！金沙脆皮銀蘿腸 $25 有驚喜，首先條菜有薑汁味，之後腸粉皮夠滑，餡脆中有蘿蔔絲，口感好豐富。推介！濃湯杞子浸時蔬 $18 嫩菜清甜，剪開一半方便夾，個湯都飲埋。

平時番工都無時間去飲茶, 星期六日又多人又貴, 早幾日行過見到依間點心到新開張, 今晚就黎飲個夜茶門面幾靚仔, 我成9點先到都竟然有9成滿座, 我諗早少少黎都要排隊入~裝修簡約得黎企理, 牆身大大隻字睇到有咩點心食, 又幾得意~點心都好多款式, 仲有蒸飯燉湯, 另外menu後面仲有甜品黑金流沙包竹炭包比一般普通蒸包更有口感, 流沙效果不錯, 奶黃味道好沙參肉竹燉土雞燉湯係我至愛, 依個湯非常清甜又熱辣辣, 而且飲落唔似有味精, 見佢d湯料都好足, 應該係真材實料煲出黎推介晶瑩鮮蝦餃本身叫左兩隻蝦餃, 落單時店員話新開張每人送一粒蝦餃或者燒賣, 太好啦❤哩個蝦餃唔止入面足料, 連個蝦餃皮都好好味, 略帶煙韌又香, 真係出色原隻蝦燒賣咁我地就叫埋兩粒燒賣試下啦, 好大隻既蝦係面頭, 而家出面食燒賣多數都係幾粒蟹子裝飾下, 依度d點心都幾有誠意喎金沙脆皮銀蘿腸見佢有個推薦圖係度就即管試下, 唔會淋badbad既腸粉皮入面包住一層脆既類似米網既野, 再入面係白蘿蔔絲, 多重口感而且蘿蔔好甜, 仲有少少芹菜令味道更加香籠仔金銀蒜海蝦飯依個飯上枱既時候, 第一下反應係: 哇, 好抵喎❗只係36蚊,