大中華飯店 (已搬遷) 新店位置

去到長沙灣，太多好選擇，就去左舊居街囗的大中華雖然經過真係無乜入去既意欲，但朋友都話去，就坐低左坐正個位望住炭爐，“抽風好，唔熱唔臭“食左其他乜野又真係唔記得了因為食到大半，忍唔住叫個燒鵝好食到傻。完。

已經食過無數次，今日個朋友仔生日，我就推介長沙灣大中華比佢，雖然佢地方污糟邋遢，可以用冇咗修理來形容，侍應亦都冇禮貌，但係就有香港大排檔嘅味道，本身book咗8:00，我哋7:45已經去到，佢話有位人齊可以入得，可能係未攞到酒牌嘅關係，要自己去門口士多買，都幾唔方便，朋友話好想食燒鵝，叫咗半隻，好有驚喜，上到枱仲熱辣辣，好入味，連個胸都唔鞋口，好過好多打正招牌嘅餐廳，仲叫咗個白滷水拼盤，起碼有8-9款嘢食喺裏面，價錢超平，適合一大班朋友

大中華本身已經相當出名，亦有電視台嘅飲食節目報導過佢哋，我都係因為咁先識得去幫襯，仲曾經遇見過電視台演員喺度聚餐。最近差唔多每星期都打羽毛球，然後至同波友一齊出去食晚飯，大中華就係其中我哋經常幫襯嘅一間。因為都係８點鍾之後，所以都唔駛點等位，亦唔駛怱怱食完俾人趕要交番張枱出嚟！幫襯咗咁多次，今次終於寫番個食評。餐廳嘅環境同裝修都係大排檔格局，由多個鋪位串連而成，但係好多都要由後巷入去。大中華本身唔賣酒，要飲酒就要自己去巷口嘅士多買，其實間士多應該都係佢哋嘅。佢哋另一個”特點”就係落單要自已寫。而佢哋嘅食物都秉持大排檔特色，講求味道而不重賣相，好似以前食過嘅薑蔥魚鳔咁，炒到兜亂曬咁，啲魚鳔又一舊大一舊細咁，但係味道就好好！今次４個人叫咗４餸１飯，包括燒鵝半隻，上湯菜心苗，蔥花黃鱔，煎墨魚餅同臘味煲仔飯。燒鵝係新鮮出爐，賣完就冇，有時太夜去到就冇得食。所以都能夠做到皮脆，加上皮下一層薄薄嘅肥膏，真係甘香無比。以我食過咁多次呢度嘅燒鵝，今次未算係最好嘅一次，但係已經非常好食。要食燒鵝就唔駛一定去深井或者中環間名店！作為一個食肉獸嘅我，差唔多每次都主動點呢個上湯菜心苗，仲食唔少。菜心苗每次都好