茶木‧台式休閒餐廳 (PopCorn 1)

營業中

休息中

琴日剛去完旅行返黎，今日婆婆就急住搵隻孫。咁就順便一齊食個下午茶同去行下街啦。食下午茶係因為我地都瞓到好晏呢。一心諗住去茶木食下午茶，因為記得上次去食個下午茶好抵架嘛，比淨叫一碗麵平，重要連飲品，但份量又唔係細好多。點知今日去到話冇下午茶喎我問左兩句點解冇左既？我老公就嫌麻煩，話冇所謂啦，可能係我記錯，或者假日本來就係冇下午茶呢。我心諗我有所謂喎，有下午茶同冇下午茶個價差好遠架嘛。冇下午茶我可以去第二間食。真係未食就已經谷住谷住。食食下，我見另一枱都有人問，點解冇左下午茶，即係唔係我問題。仔同老公都係叫牛肉麵，一如以往係好味的。最鍾意個湯。我既例牌，鹽酥雞麵，佢地既鹽酥雞真心好味，切起既大細亦都岩岩好易入口，另外個湯，真係好好味。一向食麵，拉麵，車仔麵，牛腩麵果D我都唔會飲個湯的，係茶木個湯，我每次都會飲。因為冇包飲品，只係叫左杯珍珠奶茶同老公Share飲。婆婆點的士多啤梨多士，因為婆婆食左lunch先出黎呢，所以佢就叫個甜品，等我地食完麵一齊食啦。講真，茶木既多士靚就真係好靚，影相打卡係一流。不過口感同味度呢，我就麻麻地欣賞啦。硬過石頭，咬完口都痛，味就普通雪糕果D囉。

同仔仔睇完戲，約左朋友一齊食晚飯。其實都唔知食乜好，係POPCORN行左個圈，都唔知食乜好。行過茶木，本來小朋友話唔食，食第二間的，但見人多，我就叫佢地自己再睇下，我係度排隊等位位先。結果都等左成20分鐘先有位，係有位前，小朋友都走返黎囉；話都係睇唔岩，是旦啦，都排左隊就食茶木。偏食的小朋友，入座後都重係話冇乜好食，食少少就算。所以我地叫左一個炸豬扒麵，一個炸雞扒麵，係預偏食的小朋友淨食麵的話，我仔都可以幫佢清左D肉類，冇咁浪費啦；同埋我同仔都習慣仔會食我一半，所以另一個炸肉係我既。而朋友都仔仔就各自叫左辣牛肉麵，同普通牛肉麵；我影相影漏左呢，唔知冇影邊隻麵。四個人，叫左三杯飲品的，茶木既飲品係OK既；只係唔好叫珍珠囉，因為我都係覺得佢地既珍都硬硬地。炸豬扒同雞扒麵。雞扒係好食過豬扒好多好多。豬扒個炸粉又痴唔實，又乾；但雞扒重好Juicy，個炸皮都好貼。而個麵呢，係勁好食，個湯超好飲，竟然連偏食到暈既小朋友都勁係度飲湯，勁難得佢一個人食左三份之二個麵同飲晒D湯囉。所以，依間應該會一試再試。之前仔仔都食過牛肉麵，但果時我都冇試過湯，只係食左啖麵；而仔仔係話過個湯好味過樓上小王同隔離商場間