銀龍粉麵茶餐廳 (已結業)

嚟到長假期嘅第一日,我同阿肥都決定全日留喺屋企好好休息,三步不出閏門,不停咁煲劇過渡上次去銀龍茶餐廳堂食拎咗佢哋張外賣紙番嚟,今晚一於試下叫外賣。打完電話之後,等咗大約15-20分鐘左右就有人噤門鐘喇~都算幾快喎我就叫咗個大蝦仁星洲炒貴刁($56蚊),再加一杯凍咖啡走甜($10蚊),唔知係咪心理作用,我覺得外賣嘅份量好似仲多過堂食咁,個食物盒好大,炒貴刁嘅份量都塞到滿哂,對我嚟講分兩餐食都可以。由於佢送過嚟嘅時間唔算長,所以打開盒蓋入面嘅食物溫度都仲保持夠熱,貴刁炒得並唔乾身,濕潤度適中,星洲口味微辣帶點咖哩的香氣,裡面仲有條狀嘅碎叉燒肉同埋芽菜,大蝦仁嘅份量亦都唔小。不過杯凍咖啡就失色咗小小,入口有啲澀同埋嚡...下次都係飲番熱飲好似好味啲。阿肥又食銀龍嘅福建炒飯($58蚊),睇嚟佢真係覺得勁好味,差唔多十次幫襯銀龍有八次都係食佢。另外阿肥仲叫咗碗羅宋湯($18蚊),原來湯品都可以單買,不過$18蚊一碗對我嚟講就好似貴咗小小,不過見阿肥都撈到幾多湯渣上嚟,又有西芹又有紅蘿蔔又有牛肉咁,都有啲料到,不過眼見就略嫌油咗啲啲。

兩口子冇買餸煮晚飯,落雨C濕又唔想去太遠,最好嘅選擇就係落去屋企附近嘅銀龍茶餐廳啦。以前喺旺角有一間超大間嘅銀龍,但係嗰時覺得佢好貴所以一次都冇幫襯過,但今時已經唔同往日喇,有番咁上下名氣嘅茶餐廳而家普遍都係差唔多嘅價錢,所以知道屋企附近開咗一間都覺得可以為外食帶嚟多一個選擇。油塘呢間分店光線都好充足,地方夠濶落,晚巿時間嚟都唔會太過多人,客人都係大約佔半數座位,職員大部份都幾勤力,唔會只係掛住睇電視或者吹水傾計,見到就算冇人點餐佢哋都好積極清潔地方同埋整理餐具,值得一讚 今晚想有啲米飯落肚,所以我就叫咗個西炒飯$52,阿肥就叫咗個鐵板珍寶雜扒餐$85~ 佢份鐵板餐睇落都幾抵食,跟餐湯(羅宋湯)同埋法國牛角酥,主食可以揀配茄汁意粉,另外再包埋嘢飲(凍檸茶少甜)。個鐵板有豬扒+牛扒+雞中翼+火腿片+香腸同埋煙肉,份量都算多男士真係啱哂喇一定唔會唔夠飽 而我個西炒飯亦都係超大碟,我食咗一半都夠哂皮喇,剩番嗰半都俾阿肥掃埋,個炒飯好足料,除咗蕃茄粒腸仔粒之外仲有蝦同埋翠肉瓜粒,米飯都炒得夠乾身粒粒分明所以口感唔錯,連阿肥都話啖啖放入口都有餸,冇渣流灘㗎另外我叫咗杯熱咖啡,都幾香同夠滑,唔錯。