味苑 (已結業)

早前係FACEBOOK 見朋友去咗”味苑”食咗個叫”金沙明蝦球”非常吸引, 好想去試, 於是放工約埋朋友去開餐！位於灣仔嘅味苑, 鄰近港鐵出口交通方便。 樓高兩層,地下一層放有幾張中, 小形枱, 雖然地方不算太大, 但上層亦有獨立房間放有兩張大枱, 無論三五知己或是一班朋友聚餐都係唔錯既選擇。今日就只係得我同朋友兩個食飯, 所以我地都唔可以叫得太多, 最後我地叫咗兩款小菜, 除咗”金沙明蝦球”之外, 我地仲叫咗個”味苑小炒皇”。好快第一味餸”金沙明蝦球”已到, 好香咸蛋黃味, 白飯未到已忍唔住先咬咗一口, 明蝦大大粒, 咬落去非常彈牙, 包喺蝦外嘅蛋黃厚度適中, 唔太少又唔會太多。第二度菜”味苑小炒皇”以韮菜,蝦粒, 大蝦乾, 吊片, 菜脯同杏仁炒成, 外面大部份會以腰果炒, 但味苑以杏仁粒炒, 配搭好好,而且仲好有口感, 韮菜好新鮮, 蝦乾唔硬, 蝦粒,吊片同菜脯加埋, 非常香口, 送飯一流, 所以最後成碟食得乾乾淨淨。相反, 蝦球我地就食唔晒啦, 因為份量十足, 一碟有成10大粒,我地每人食3粒已經有D飽, 最後都係要打包再食。是日晚飯$356

先前farewell同事黎食過點心覺得唔錯，今次同舊同事飯局我就提議再黎，但同預期有少少落差。我地一行四人本來就想食點心，於是叫左包4款點心、2款小菜、例湯、甜品同白飯既自選四位餐 ($568)。點心揀左味苑蝦餃皇、蟹籽燒賣皇、醬皇蒸鳳爪同新鮮叉燒腸，全部味道不過不失，同一般連鎖酒樓差不多，冇咩大驚喜。 味苑蝦餃皇同蟹籽燒賣皇足料彈牙，唔算特別大粒，亦唔會太濃味。 醬皇蒸鳳爪軟腍惹味，岩岩四舊夠四人分。 新鮮叉燒腸入面既叉燒偏瘦唔太靚，腸粉皮略厚。小菜薑蔥龍躉頭腩煲上得好快，龍躉頭腩雖然有骨但都幾多肉，先炸過然後同大量蔥段同炒，香口得黎又嫩滑。 不過份量較少，全煲薑蔥佔左七成，每人分到兩細舊，唔太夠餸飯。金沙明蝦球好有驚喜，首先午市黎講，下面有炸鳥巢墊住上台已經係意料之外，蝦球大大粒好彈牙，最正係金沙好幼滑唔會膩，濃郁既咸蛋黃醬同鮮味既蝦球好夾，我地連鳥巢上剩底既碎都食埋，最後仲用左黎撈飯，超正！鳥巢雖然吸引但就唔洗試喇，似係米網紙預先炸定，食個時已經唔脆亦冇味，但整體成味餸都好好味，有機會會encore。雖然兩款小菜每人都分到兩舊，味道亦唔錯，但份量感覺好少，惟有呆望住碗白飯輕嘆。 

有日無聊碌facebook見到有抽獎 抽片皮鴨🙈我立即參加左 估唔到我真係中到呀‼️‼️‼️所以帶左好姊妹去食飯聚一聚😝呢個係送嘅片皮鴨 質數不錯的有啲連肉 有啲淨皮 頗脆的👍🏻金沙明蝦球 咸蛋蓉沾滿整隻大蝦 蝦嘅鮮味加埋咸蛋嘅香 頂呱呱👍🏻叉燒皇 肥瘦適中 唔會太肥膩 叉燒燒得好香 脆炸牛坑腩 炸粉薄薄包住牛坑腩 脆口牛坑腩牛味濃 肉質淋 肥瘦分明黑松露砵酒焗蠔 有八隻架🙈 俾朋友搶先一步食左😝蠔夠唒大隻 加埋黑松露 好高貴喔環境方面 安排左入細房 得三枱 比較冷靜👍🏻 侍應服務良好 舒服開心嘅一餐 ☺️