拉麵台風 (已搬遷) 新店位置

經過見到呢間日式拉麵店好多人排隊，咁多人排隊等嘅嘢食一定係好食嘅，就試一試啦！排隊嘅時候店員會比餐牌你，等你可以慢慢諗想食咩拉麵，店舖主要賣五種拉麵，分別係魚介豬骨湯拉麵，骨膠原撈麵，伊台風(蕃茄芝士湯底)，沾麵，同埋限定嘅極限台風。🍴 魚介豬骨湯拉麵 $78今次試一試佢個基本拉麵，店舖建議試咗個湯最後先撈魚介粉。食麵一定要飲湯先，個湯超級濃豬骨魚介味，食得到魚介嘅鮮味，唔會好鹹，好好飲。個麵嘅份量好大，應該係一般拉麵鋪嘅1.5倍，如果食唔晒可以叫少啲份量嘅麵，個麵係比較粗，軟硬適中，好有口感，好彈牙，個人比較鍾意粗嘅麵。叉燒比較瘦，但唔會太鞋口，ok好食。糖心蛋，雖然得半隻，唔係好夠食，但蛋味好濃。佢都有好多調味料提供，有蒜蓉，辣油，胡椒，七味粉，都好推薦大家加唔同嘅調味料，可以提升拉麵嘅層次，亦都唔會食淨係識一個味道會覺得好寡，我就比較鍾意蒜蓉同辣油，真係好香口，令到拉麵更豐富。推薦指數: 9/10整體嚟講，真係好高性價比，$78食咗一碗份量咁多咁高質嘅拉麵，真係覺得自己賺咗！推薦！

突然好想去荃灣行一轉，好耐冇去打街機啦！玩左一陣之後突然記起拉麵台風係荃灣，咁啱老友收工係5點半係荃灣，所以約埋老友去食麵。大約5點50分左右已經有十幾人排緊隊，以我所知店內唔係好大，好彩早到黎排隊，一夠鐘開店就可以入店啦。我同友人一樣點左魚介豚骨湯拉麵，係旺角台風食既沾麵湯有啲唔同，哩碗拉麵既湯口感比較濃稠，😋👍👍有濃濃既豚骨湯味中有淡淡既魚介既鮮甜味，麵使用既係中太麵，比起旺角店食既沾麵感覺上幼身啲🤔口感一樣彈牙，麵質煙韌爽口😋😋👍👍麵入面既配料有叉燒，糖心蛋，京蔥，竹筍。叉燒有兩塊，睇落唔係好肥好似好瘦咁，不過食落去唔會柴，而且好有肉既彈性，糖心蛋有半只，可惜蛋黃流心比較少，竹筍有再加工，有淡淡既麻油，冇左筍個種怪味，好細心呢😋🥰🥰係紫菜上有一匙木魚粉，食左一啖麵之後加埋落湯度再食麵，將木魚粉同麵沾埋一齊再食，增加左豚骨湯入面既甜味😋😋真係好好味丫，如果觀塘區都開到一間就好啦。🥰店內既位置大約有十幾個位，枱係使用淺色系既石材，桌面乾淨整齊唔會黐立立，✨✨播住適當音量既音樂，🎶🎶枱下面每個位都有個籃提供比客人放手袋，店內環境算幾好，只係我坐個張櫈搖得好勁🤔下次再黎荃灣會再黎食麵。🥰