以南印度菜式Chettinad料理為主打嘅印度菜餐廳，喺香港並唔常見。位於尖沙咀嘅Anjappar Chettinad Indian Restaurant，喺全球17個國家中有逾70間分店，並以混合多種濃烈香料烹調製作料理而聞名。餐廳由裝潢、食材到員工都富有異國風情，到訪用餐就好似去咗一趟久違嘅中東小旅行。
Chicken 65
韓式炸雞就食得多，印度式嘅炸雞又係點？紅卜卜，但冇想像中咁辣，香料味道平衡，仲好juicy同脆口添。
Garlic Nann、Kashmiri Naan
食印度嘢梗係唔少得薄餅，無論點醬定係咖喱都一樣咁襯。Naan大大塊，口感鬆軟，而且蒜香味突出，即使點完濃郁嘅醬料，都依然可以食得到。
Butter Dosa
牛油煎薄餅單係賣相已經先勝一籌，捲成長筒形。呢款南印度嘅主食，有啲似印度版Crepe。邊位煙韌中間香脆，既有牛油香味，亦有淡淡芝士鹹香。Dosa以豆同米混合麵糊製成，跟配4款印度香料醬汁，有清新口味，有鹹、有甜，亦有豆泥口味，各有特色。
Butter Chicken Masala
印度咖喱絕對係必食，黃油雞咖喱味濃香，加埋番茄落去製作，辣度剛好，仲好開胃添。最值得欣賞嘅係雞肉去晒骨，食落啖啖肉，又入味又方便。
Bamboo Biriyani Chicken
印度竹筒烤雞炒飯夠晒特色，原個竹筒上枱，好啱打卡。飯量十足，粒粒米飯沾滿印度香料，另外可以蘸點乳酪等醬料，中和濃郁嘅香料味道。
Tandoori Pomfret Fish
印式烤魚，以大蒜同胡椒醃製而成嘅魚肉，帶有陣陣炭燒香，非常惹味。而且師傅控制火候得宜，魚肉都幾嫩滑。
Anjappar Fish Meal
印度傳統料理之一，好似個大拼盤咁，有唔同種類嘅咖喱、蔬菜、醃漬物甚至甜品等，由清爽到濃味嘅都有。圍住中間嘅主食，可以隨便配搭，完全可以體驗到印度飲食文化嘅精髓。魚肉新鮮、香而不辣，有款甜品更帶濃濃椰子香。
Mutton Sukka
羊肉咖喱同樣都係帶有濃郁嘅印度香料味道，炒香過嘅羊肉羶味唔會話好突出，而肉質仍然保持鮮嫩。
Pundina (mint flavor) Chicken Tikka
印度咖喱唔一定重口味嘅，呢款以薄荷同綠辣椒醃製過嘅雞肉，早已染成綠色，肉質嫩滑，帶有清新嘅薄荷香，就連咖喱醬都有薄荷味，有種fresh嘅感覺呢。
Mutton Liver roast
羊肝味道或者會有啲羶，但大廚將羊肝切開成小片，加入洋蔥、黑胡椒粒以及Chettinad香料一齊炒香，令到羊肝變得更為香口，層次有所變化。
Mutton Nalli Roast
連骨上嘅烤羊髀，賣相吸引，加入洋葱、番茄同Chettinad香料製作，香嫩可口。
開飯仔依家仲有好野益大家！於2022年4月29日至6月9日期間，到【Anjappar Chettinad Indian Restaurant】消費並上載有效收據到指定網頁， 隨時贏取豐富獎品！ 食得愈密， 得獎機會愈大，超過200份獎賞等梗大家！快啲約埋飯腳開餐啦！
Anjappar Chettinad Indian Restaurant
地址: 尖沙咀寶勒巷3-7A號萬事昌廣場2樓202號舖
電話: 34285757