彩雲軒 (已結業)

(8/7/06)男友鍾意黎呢間,咁又係既,價錢較合理,小菜又炒得好。今次又叫,欖菜肉鬆涼瓜,但好似細碟左&欖菜少左。花香檳骨,好橙味,係肥左DD。鮑汁炒山菌,鮑魚汁唔會預咩鮑魚味喇,墊底的炸金菇,炸過仍好有菇味,而且口感幾得意。上湯莧菜,"淋"度o岩o岩好。蒸東星斑(兩斤)蒸得好好,好大條o下,最尾食到你讓我讓。生果盤進步左,外觀靚左,種類多左(橙,蜜瓜,西瓜,木瓜)這晚無人擺婚宴,如果唔係就會噪雜D咯。　

同媽媽行街行到累, 見呢度唔駛點等位就上左黎啦, 個場都好大好闊落, 個晚重有人擺酒添3個人叫左香橙肉排,豆豉雞煲,鮑汁炒什菌, 真係好快d食品就到啦, 可能趕住係酒席開之前煮晒散餐先啦, 正!!香橙肉排個賣相唔錯, 肉都好腍而且多肉, 無咩肥, 橙香十足又不太酸,豆豉雞煲的蒜同蔥就好多, 雞就不太多,但都有肉食的但就好油,有點令人反胃.....鮑汁炒什菌都不錯, portion大之餘不太油, 個味都好濃, gdservice的人很多, 反應快而且有禮貌, pricing適中,不錯不錯

上星期五, 一行12人去farewell個同事, 星期四已訂好枱, 點知去到佢話我哋無訂, 仲屈我哋講錯日子, end up班同事等咗20分鐘. 12人逼埋張8-10位枱, 坐得辛苦時, 仲要追單喎, 你知啦, 食飯一個鐘, 等位20分鐘, 吹埋單, 食得好辛苦呀!

尋晚又同左爸爸媽媽黎食飯。呢度都算係我同屋企人出街食飯o既飯堂。小菜算多款式，大致上都煮得幾好食！尋晚叫左四樣野：羊腩煲：不過不失，ｄ羊略嫌太肥。配料有冬荀、冬菇、馬蹄、豆卜、薑，都幾入味四川炒蝦仁：酸酸地，少辣，鍾意食辣o既人應該覺得唔辣～不過幾好食！蒸魚（白瓜子）：蒸到過左火，略油湯浸豆苗：冇乜驚喜，唔鍾意佢用金華火腿絲舖面糖水：我同爸爸食西米露、媽咪食蕃薯糖水。媽咪話佢果個ｏｋ，但西米露就唔得！ｄ西米係一pat野咁，完全冇咬口，ｄ糖水過甜！

難得母親大人出巡,君臨尖沙咀,最好就係去飲茶.喱間酒樓食雁都有D特價點心,但其實點心味道一般,可能同一集團D料同來貨一樣,冇咩特別.反而額外叫個叉燒飯仲有睇頭,D叉燒肥瘦適中,仲熱熱地,肉質夠晒腍而且仲係白色o既,母親非常欣賞,想即時買D叉燒打走.

(22/10/05)男友媽生日,本來去翠亨村,但full book,咪諗起來過不錯,就介紹他家人來個豐富的晚餐。這晚有擺左兩家喜宴,吃飯的範圍不太多。首先叫左個小吃鹵水豬腳仔,我試了一件,唔太識欣賞。當然大家覺得好味嘅。叫個六人套餐$688 & 再番兜上次食過的欖菜肉鬆涼瓜脆肉瓜。套餐例湯:三班魚,粉葛湯,味道好似屋企煲咁,飲唔出有味精,good呀。芥辣炸蝦球,個蝦如果調點味好d,因為芥辣味太輕手了,不過都是個幾特別的菜式。清蒸石班,斤四重,都好大條架,蒸得o岩o岩好。炸子雞,點左碟好味甜豉油,正呀。疆蔥炒蟹一隻,我只食左個蓋&一隻"舂",都ok冶味。最後是一大碟湯煮瑤柱白菜仔,很清啖的。再加半打壽包,都不是太甜。套餐的甜品,就是門口show晒出來的四式甜品,我地揀晒六款唔同的。香草慕思、芒果慕思、朱古力心太軟、法式燉蛋、芒果芝士蛋糕、一個裡面有合桃,芒果粒,一d好似椰絲,但又唔係椰絲的春卷,呢個麻麻。慕思整得好浮,預左;心太軟是大家最讚的;法式燉蛋,同芒果芝士蛋糕都好好味。淨叫一個甜品都$16-$25,而家咁食都幾抵。service又好,真係highly recommend呢間up-

今日Lunch過o黎搵女友飲茶.原先諗住去稻香o既~但因為o係新港正門入o既關係見到呢間先.見佢好似仲有位咪是但坐低囉~兩個人叫o左5樣點心:粥,牛肉, XO醬煎腸粉, 鳳爪同埋糯米飯.鳳爪同腸粉唔得!前者個賣相唔得, 後者過辣.其他OK.侍應算有禮貌但都有落錯o野.一般o野.食完先知原來係好彩彩團o既.咁就好似失色o左D囉~

同事結婚，設宴於此。這幾年親朋結婚都在酒店擺酒，全部都會分餸，好冇feel﹗同事在些擺酒，菜色不錯，最欣賞是蒸魚，大條但一點也不老﹗呢間酒樓唔分餸，加上全枱都熟絡，唔分餸真係開心好多﹗不過服務真係會差少少，叫極都唔加水﹗

同一班波友飲茶，地點約了在這裡，原來在同一層內都有三間食肆，問搞手點解揀這一間，答案就是~平。這個集團都採用同一個模式，就是每大檯都有個folder，點心紙、菜單都夾在裡面，仲有原子筆一支，幾周到。呢度地方大，檯又夠多，我地十幾人坐一張大檯，一點也不迫。在座的，除了小朋友外，全部都是重量級人馬，所以拿住張點心紙，頭一轉係唔使諗，樣樣都要。點心普遍水準都不錯，起碼樣樣炸的都熱辣辣，包點都係，個糯米雞係最好味的，偏乾，有乾貝的香味，不錯。腸粉就普遍差了一點，太糊口了，連炒腸粉也糊糊的。魚腐就差了一點，腍腍的，也沒有魚味。飯麵方面，個清湯魚麵不錯，清清地，魚麵粗粗的，幾好。這裡也有西式甜品如疏乎厘、芝士蛋糕等，不過在中式酒樓吃這些，沒有興趣了。侍應招呼，是有好有唔好，部長招呼好，後生的就漫不經心，打個和。食左三十幾個點心，埋單六百幾，又幾便宜，都不失為同豬朋狗友飲茶的好地方，同家人的話，可以再找些好一點的。

前排有朋自遠方來，諗住搵間唔錯的中菜館同佢洗塵。聽過朋友講新港中心彩雲軒唔錯，所以就一行十幾人上去試試。去到一坐底，侍應姐姐不停咁向我地推介貴價海鮮，奈何我地對海鮮的興趣不大，所以只係叫左個平價的套餐。當時侍應姐姐的面色都唔多好睇，不過無所謂啦，又唔洗望住佢食。食物未上，開左幾壼茶。其中一壼應該係普洱，點知一倒出黎就見到有一隻腳浮係上面。見到咁驚嚇的場面當然第一時間叫部長黎啦！點知過左五分鐘部長都未到，侍應姐姐話佢好忙、唔得閒。我地堅持一定要見部長，等候的期間，我地拎晒身上的手機、相機、PDA同隻小強的腳拍寫真。張相影得好好，連腳毛都影埋！再等左一陣，部長終於現身。佢拎左杯茶去研究，從杯茶入面拎左隻腳出黎，起勢咁掐爛佢，然後話：『杯茶無問題呀！如果你地覺得有問題，我幫你地換過D茶。』我地向部長表示唔敢再飲茶啦，佢竟然話：『咁我俾D滾水你地囉！』部長由始至終都唔承認果隻係蟑螂腳，亦表示過歉意，就連對唔住都無句。結果我地拉隊走人，行左過隔離的『儂』。

記得數月前於周日到老尖攪簽証，之後跟朋友一行四人到這裹午膳，點心質素不俗，特别喜歡這裹的奶皇飽及ＸＯ醬炒腸粉，而炒粉麵亦都幾好，環境亦很舒適，座位不會太，因為是午市繁忙時閒間，沒有特價品，所以價錢也不算低，總括而言都算OK!

(16/7/05)男友想吃小菜晚飯, 本想去稻香, 唔明點解稻香成日要等位, 所以放棄了。轉個角, 哩間都ok。本菜牌以外, 有張小菜介紹, 全部都好吸引。酸薑皮蛋, 係流心皮蛋嚟架! 琵琶豆腐, 好味, 不過豆腐多過魚肉。欖菜肉鬆涼瓜, 哩個咸左DD, 但都好得呀! 除左涼瓜粒外, 仲有脆肉瓜粒添啊!仲有叫左個蒜香豆鼓釀青椒。有四件, 其中一件辣得要緊啊! 因為哩種係長身幼幼的會辣d嘅。每台都會送水果(西瓜&木瓜)。值得一讚嘅係, 佢上個生個來時, 會鋪張餐巾再放碟水果, 跟住會換埋杯茶, 服細心又務一流呀!

前兩晚一行十幾人同親戚食飯洗塵,叫成食. 整體上算係ok,可能始終成日食廣東菜,所以唔覺得有咩特別^_^

一行四人黎飲茶, 試左幾款點心.煎腸粉係幾層粉皮黐埋一齊咁, 煎左唔知幾耐, 表面好韌, 而且勁多油.蘿蔔絲酥餅個餡幾好, 但外層又腍又散, 同「酥餅」二字拉唔上關係.南乳粗齋同琵琶豆腐都好油膩, 八寶飯又乾又硬又無味, 白菜餃、叉燒酥、奶皇包呢幾樣叫ok. 至好味係椰皇燉雪蛤, 雖然得果兩粒雪蛤膏, 但味道清香. 最唔掂既係, 大部分點心都係唔熱既.星期日中午呢度都唔駛等位, 頗多吉檯, 其實已間接反映左佢既水準.

前言：據老爸所言，此店的特價點心轉了款式。週日早上，冒著寒流，跟老爹兩個人去吃「港式點心」。食物和評語：兩個人，點了四個點心、一個腸粉、一個甜品。十一點九前，免茶錢。加一後，兩位共$58。 1. 羅漢上素餃（$8；皮厚如潮州粉果，餡料下了相當豬油，有點噁心！）、嫩滑蘿蔔糕（$8；實為原個蒸迷你蘿蔔糕，相當嫩滑，唯蘿蔔料過少，粘米粒醬佔了八成！） 2. 豬皮蘿蔔（$8；豬皮有毛，狀甚恐怖！蘿蔔切成迷你小粒，邊食邊駡！）、雜豆雞粒腸粉（$10；餡料太少，如嚼塗上豬油的齋腸粉！）、養生粟米粥配油條薄片（$8；兩飯碗份量的粥，只有四罐頭磨菇和少於十粒的玉米粒，料少得過分！） 3. 雪蛤燉椰皇（$10；穩穩陣陣的食品，水準保持到，但份量少了兩成！） 4. 菊普濃茶（免茶；好香菊花味！）註： a. 整體上，一次比一次差！ b. 大部份食物的賣相有待改善，如欖仁馬拉糕！ c. 人手嚴重不足。