影片
以上資料只供參考, 請與餐廳確認詳情
相關文章
趁住天氣仲未開始太熱，就諗住去馬鞍山海旁行下，輕鬆下。行返商場嘅時候，見到有間泰國餐廳，入面都幾多人，諗住應該唔錯，就入去試吓。一入到去，店員都好親切咁用泰文同我哋打招呼，之後帶我哋入座，又幫我哋倒水，俾埋餐牌。座位都幾寬敞，連張凳都有啲心思，雕咗隻大象喺度。地下都幾乾淨，感覺唔錯。跟住就叫咗個燒西冷同埋蟹肉炒粉絲。本身想叫七成熟，不過侍應哥哥好專業，話驚我哋覺得太韌，建議五成熟就夠。燒西冷一上枱，果然冇介紹錯！五成熟啱啱好，啲肉幾嫩幾juicy，又冇雪味，唔會韌到咬唔開。佢哋應該燒之前醃過，所以除咗有肉味，仲有陣香料味，唔係死鹹嗰隻。跟住仲有啲酸蘿蔔同青瓜墊底，食到有啲膩嘅時候，食條酸瓜中和下，都幾開胃。唔使好耐，成塊扒已經食晒！佢仲有兩款辣辣地嘅醬汁俾你點，我比較鍾意佢個泰式醬汁，酸酸辣辣，幾似泰式生蝦醬嗰隻味。之後到蟹肉炒粉絲，一上枱已經聞到好香，啲粉絲仲熱辣辣咁冒住煙，一路食到尾都仲係咁熱！啲粉絲炒到幾乾身，唔會黐埋一pat pat。除咗蟹肉，仲有炸過嘅蔥，食落去都幾脆，仲有洋蔥、芽菜、青椒紅椒、泰國腸咁，撈埋一齊食，口感幾豐富，仲有鑊氣添！啲蟹肉都幾新鮮，冇腥味，會令人想再食多啲。跟住仲叫咗個鐵板蠔仔炒蛋，一上枱就聽到啲鐵板吱吱聲，雖然唔係好大份，但係啲味都做足。啲蠔仔唔係好大粒嗰隻，但係都幾多蠔味，又冇腥味，配埋啲芽菜同洋蔥，冇咁熱氣。個蠔餅啲魚露味幾出，其實齋食蠔餅同芽菜已經夠味。最後甜品叫咗個芒果糯米飯，佢除咗有白糯米，仲有紫糯米，最正係啲糯米飯熱辣辣，同啲凍冰冰嘅芒果一齊食，冰火交融咁，幾好！白糯米軟糯啲，紫糯米就淋啲，但係有陣特別嘅香味。啲椰汁都幾夠，啖啖都有椰汁味。啲芒果又甜又冇渣，啱啱好。仲有，要讚下佢哋嘅服務，啲哥哥姐姐就算幾忙都好，都會問你有冇嘢未上，笑容可掬。仲見到有個姨姨氹BB仔，同佢唱ABC歌，聽到員工們私底下講嘢都係講泰文，都幾有泰國feel！呢啲服務態度，都幾值得再去！
繼續閱讀
呢間泰國餐廳算係飯堂之一， 坐得舒服，菜式種類多，好多都試過，質素好穩定。 裏面嘅樓面廚師全部都係泰國人， 好似去咗當地餐廳咁， 菜式口味正宗。 仲有一個細節我覺得係比較好嘅， 就係會主動為客人斟熱水， 對於東方胃嘅我嚟講係一個credit。泰國青芒果沙律（$88)擺盤靚，材料好豐富，有泰國芒果絲、蘿蔔絲、洋蔥絲、花生、生菜等等。 泰國青芒果比泰國木瓜爽口， 而且水分多少少。 醬汁較多，係酸酸甜甜， 又辣辣地，係一道開胃菜。燒原隻魷魚（$128）原條魷魚白雪雪、脹卜卜咁，一睇就好新鮮。 魷魚切成一圈圈， 鮮味彈牙，每個圈圈都有泰式辣椒醬， 呢度辣椒醬係有少少籽嘅，有炒過，好香。 仲配咗泰式辣醬， 香辣同甜辣味混合得幾好。泰國街邊豬肉串（$88）呢個串燒係我最鍾意嘅一道菜， 一放低就聞到炭烤嘅味道， 真係街邊檔口炭燒嘅香味。 呢個豬肉串用嘅肉同沙爹拼盤係唔一樣嘅， 肉質比較淋，醃過嘅， 比較入味，出面又脆脆地有啲焦香。越式蟹肉炒粉絲（$118)平時食開泰式炒金邊粉， 今次第一次食呢個炒粉絲，口味比較清新。蟹肉多， 有鮮味，又加咗好多蔬菜，有生菜、芹菜、燈籠椒、芽菜、洋蔥，仲有香口嘅炸蒜同扎肉， 口感層次豐富。 粉絲係比較乾身，唔油膩， 有越南菜健康嘅感覺。
繼續閱讀
好耐冇同屋企人出去食晚飯，細妹提議食泰菜馬鞍山泰菜有兩間喺555同新泰，梗係選新泰叫咗五碟菜:分別係泰式明爐魚，蜜糖燒排骨，飛天通菜，軟殼蟹米子卷，菠蘿炒飯。估唔到菠蘿炒飯炒得咁乾身，平時出面食嘅都係好濕，但係今次炒得鹹淡得宜🥰而家個菠蘿好大個好打卡飛天通菜有少少辣，炒得好惹味，而且唔算好老。芒果軟殼蟹米子卷本身擔心芒果會酸，但係竟然幾甜😍😍絕對加分，而且軟殼蟹脆身，點甜酸醬食非常清新。雖然呢碟燒排骨唔平，但餐廳無燒燶，而家排骨就算唔點醬都好入味，好好食。點左醬又係另一個口味，而家燒得唔老亦唔會鞋口。值得下次再叫。但份糧就少啲，得四舊，但碟排骨都唔平，百幾蚊。整體覺得呢間泰菜比以前好食，唔怪得星期二晚肆都大致有坐滿餐廳入面。
繼續閱讀
最近好想飛去泰國放鬆吓，但暫時去唔到，唯有食一餐泰國菜止癮！今次去嘅餐廳環境充滿東南亞情懷，牆上嘅泰國裝飾、木系傢俬同柔和燈光，營造出一個好放鬆嘅氛圍。雖然係商場內，但餐廳寬敞明亮，座位安排舒適，唔會覺得擠迫。熱辣辣嘅菜式上枱時，伴隨住陣陣香氣，令人感覺好似身處泰國街頭，特別適合想止泰國癮嘅人。今次我叫左3樣嘢食，包括串燒拼盤，柚子大蝦沙律，鹹魚炒芥蘭及芒果沙冰串燒拼盤
串燒拼盤一上枱，熱辣辣嘅煙霧撲鼻，望落已經好吸引！雞豬牛各兩串，每款肉都新鮮彈牙，雞肉嫩滑帶有淡淡嘅香料味，豬肉肥瘦適中，牛肉則多汁又唔韌。烤得外脆內嫩，配上沙嗲醬，辣中帶甜，食落去好有泰國街頭小食嘅感覺。新鮮食材上枱時仲熱騰騰，絕對係一個好開胃嘅開始。柚子大蝦沙律
呢道沙律係夏日嘅清新之選！大蝦彈牙鮮甜，配上酸酸甜甜嘅柚子肉，同埋新鮮蔬菜同香草，味道層次豐富。醬汁微辣開胃，食落去解膩又爽口，完全感受到東南亞菜嘅熱帶風味。食材新鮮到爆，上枱時仲係涼浸浸，作為主菜前嘅調劑真係一流。鹹魚炒芥蘭
鹹魚炒芥蘭簡單但夠鑊氣！芥蘭脆口多汁，炒得嫩綠唔老，配上香脆嘅鹹魚碎，鹹香撲鼻，每啖都係東南亞家常菜嘅經典滋味。熱辣辣上枱，芥蘭吸收咗鹹魚嘅精華，食落去好有滿足感，唔會太油膩，係一個好配飯嘅菜式。芒果沙冰
甜品芒果沙冰係完美嘅收尾！芒果新鮮甜美，沙冰幼滑細膩，入口冰涼涼，帶有濃郁嘅芒果香氣。加咗少少椰奶，味道更Creamy，食落去好似喺泰國海灘歎雪糕咁過癮。呢個甜品新鮮又解渴，為呢餐畫上一個清新嘅句號。
繼續閱讀
曾於灣仔的新泰餐廳食過，所以相約朋友時，小人滿有信心地提議到分店共晉午餐。泰式春卷不單止非熱且硬，像是炸起擱了一段時間似的；本身沒甚麼味道，全靠那碟甜醬。中間塞了甚麼料亦只能靠估，好像有些木耳、豬肉、粉絲之類，真真正正的食而不知其味。泰式炒雜菜就對辦得多。雜菜包括西蘭花、椰菜花、泰式芥蘭、甘荀與蘑菇等等，炒得有鑊氣，蒜蓉的香味邊食邊透，況且調味恰到好處，清爽味美。咖哩的選擇是馬沙文牛腩。小人先試一口咖哩汁，即發現比起第一次食的欠缺了香料的層次，單薄得多！牛腩是腍的，洋蔥和薯仔卻都太甜。烤餅中規中矩，沾咖哩汁之餘要加魚露。朋友未試過泰式鴨肉包生菜，故此叫來一客。未食我們皆已經覺得超級碎，誰知一食入口，竟然辣到跳舞！辣味完全蓋過全部鴨肉的調味、香草的味道，結果我們不能完成這碟！無比較、無傷害，落差實在太極端了！
繼續閱讀