華記潮州滷水車仔麵

營業中

休息中

呢間潮州鹵水車仔面，性價比算幾高。鹵水嘅味道都幾正宗，牛腩同牛肚炆得好腍，塊頭又大，咬落去好有口感，唔會「鞋口」。最正係佢可以加多啲香菜，對於我呢啲「香菜控」來講，簡直係福音，灑滿一層綠油油，睇住都開心。不過個辣度真係要好好提下。只叫咗小辣，點知個辣勁勁到有啲頂唔順，食唔出鹵水嘅層次，淨係覺得辣。如果唔係咁怕辣嘅朋友，可能會覺得無所謂，但對於唔太受得辣嘅人，呢個辣度真係有啲「過份」，有啲影響整體口感。

今日經過西環，諗住入去試下華記，點知間鋪冇冷氣冇鮮風，熱到飛街，食到出晒汗，間鋪入面仲熱過條街，真心唔會再有下次，除非你有帶小風扇、穿小背心同熱褲，就可以一試無妨

車仔麵來講呢，華記係出色既佢有得揀菜底，仲可以揀蘿蔔我叫左三個餸，佢大碗到咁大魚蛋真係要點，足料到呢個蘿蔔係浸到腍晒，入哂味牛蒡都係好好味，仲好大塊反而，我朋友仔叫2 餸，就冇咁澎湃 😂我識叫啦，下次都會叫返3 餸會回頭的包括：蘿蔔，牛蒡，大魚蛋 👍👍👍

今次同朋友嚟咗呢間餐廳，真係有驚喜！1. **豆腐串**：豆腐好入味，我怕辣只係加少少辣嘅咖喱，都已經真係好開胃。每一啖都係享受，好啱鍾意食豆腐同埋咖喱味嘅朋友。另外仲有腩汁推介，朋友就叫左重口味推薦（全部汁），辣得過癮2. **巨型魚蛋**：個魚丸質地厚實，唔係普通個d 霉鬆泡泡的口感，配埋個咖喱一流，但係又唔會太嗆。我自己中意食烏冬，烏冬加埋菜吸晒湯，每一啖都好滿足。餐廳環境都唔錯，夜晚時段人唔係太多，也都冇特別有壓力話要趕人走。我哋係透過電子菜單點餐，好方便快捷。成餐飯食得好開心，一定會再嚟幫襯！

上星期先食完又想再返兜今次叫咗啲無咁大路嘅野，試下餐廳係咪樣樣麵整得好食。咖喱汁滷水豆腐韭菜烏冬 $59份量依然十分大碗，熱辣辣！睇其他食評，見好似無嘜人叫烏冬。心思思諗佢會唔會係日本烏冬…結果諗多咗😂係類似噹噹烏冬十分local嘅麵。唔太掛湯，但勝在無分湯外賣都無吸曬啲湯底。韭菜亦非常多，平均咁每樣餸食下，最後麵都食咗大部分，韭菜依然有大一箸！唯一比較失望係啲滷水豆腐，豆腐唔太入味，而且比較硬身。牛筋十分爽口，所有內臟亦無騷味，腩汁醃到入曬味！一定唔少得嘅秘製潮州辣椒油。係唔使額外加錢，少少都好夠辣。

見到咁多好評推介，都想試吓呢間。嗌咗三餸，的確好～多肉，但得個鹹字，無香味，面底都無味平平淡淡，蘿蔔淋，但甜味來自添加糖而非蘿蔔本身的甘甜。最期待推薦top 1嘅太陽餅，原來係兩塊餃子皮夾住啲魚滑蝦滑煎炸出來，冇乜調味要跟泰國甜辣醬食。食完之後勁口渴，唔知係咪味精放得太多，飲咗三杯水店員之間傾偈好大聲，若無旁人，影響食客體驗。好失望，唔會再有下次。

已經食過好幾次，每次湯底一樣咁濃郁。蘿蔔一樣煮到入曬味，大大舊，又甜又無個種蘿蔔嘅苦味，係必點架！之前食過河粉同油麵，今次試下米線，我自己鍾意食淋啲，可惜佢係偏硬。份量都好夠飽。豆腐串索曬湯汁，好推薦叫嚟試下。如果食得辣嘅，一定要試埋佢個個秘製辣椒油，落少少已經好夠辣。每碗都有唔少芫荽同埋蔥，唔食嘅人記得走咗佢。叫開佢外賣，最好要分湯。之前叫河粉同油麵唔分湯真係會索汁索到無曬湯汁咁濟。今次個米線無分湯麵還好。絕對會再食佢！

梗系揀佢嘅招牌牛腩啦，另外仲叫咗牛腸！呢個牛腩真系令我好驚喜！煮得超級淋！入口即化！而且一份 四十幾 蚊，有咁多肉，算唔錯啦！🤩🌶️辣度：可以選擇微辣、中辣呢啲，仲可以額外加佢哋特有嘅潮州辣椒油添！🥬配菜：可以揀好多配菜，而且價格都唔貴！好抵食！

禮拜五食晏，和同事一齊叫外賣自取車仔麵😄 我叫咗兩餸車仔麵，由於呢排想食清啲，食少啲肉，所以冇叫到牛腩或者牛肚嗰啲做餸😆 我揀咗豬紅同埋巨型魚蛋，好味之餘其實都夠飽，魚蛋都好有魚味😄同埋真係好大粒😆由於近排我唔想食太多粉麵之類嘅嘢，所以我揀咗生菜底代替粉麵😄 啲生菜都好爽口，同埋都俾咗好多塊😄湯底我揀咗清湯，都幾好😄我覺得豬紅魚蛋生菜底加清湯，呢個配搭其實都唔錯😄 我之前試過佢嘅咖喱湯底，都好有咖喱味，不過近期我想食清少少，所以就揀咗清湯底😄外賣其實都好快，落咗單大概10至15分鐘到就有得攞😄

天氣凍，就想食車仔麵～諗起公司附近有車仔麵～原本超級期待的，點知食第一啖落口，超級咸！明明以前好好食，食到湯底有藥材味，而家得死咸，完全食唔到落去同埋以前就算點兩個餸都好多餸，食唔晒而家啲餸就變到好少了，仲有以前豬大腸滷得好正，令人成日好掛住想去食，每一舊都有肥膏又淋又入味，但而家就整正超級普通，完全無滷水味又唔好食簡直係嘥我啲quota食完之後仲keep住要飲水。到底係分店問題定係整體水準都降低左？以後都唔會再黎食了

網上見comment幾好，慕名來食，不過就有點失望。我們選了一碗兩餸「魷魚鬚配牛腩」（油麵）及一碗三餸「牛大腸、豬紅配豬膶」（粗麵及多芫荽）。 還有小食「豬皮蘿蔔大魚蛋」。魷魚鬚及豬膶完全中晒伏。首先魷魚鬚完全冇味不特止，還有腥味。豬膶就好老好鞋口。牛大腸腍滑而且油香味幾好，不過清洗就不太乾淨，偶然吃到苦味。至於另一樣出名的蘿蔔，它們的甜味不是天然的，像浸過糖水再煮落去滷水汁度。其他食材不過不失，但真係大大碗，係抵吃的。最後吃完很口渴，兩三個鐘內飲咗幾大杯水仍然覺得好口渴。總括來說，叫牛腩牛雜這方面的配料比較穩陣，其他食材並沒有網上寫的好⋯⋯

知道呢間舖頭好出名，今日經過西環，過來試吓！知道佢啲牛雜和豬什，同埋啲滷水好出名！今次一定要試吓！入到去要掃code，自助叫order！感覺上好似食車仔麵一樣，而且選擇好多！面底我揀油面，今次揀三餸，揀咗牛腩、牛肚和牛筋！當然係揀佢嘅秘製滷水辣汁啦，最後竟然仲有得揀芫荽！我呢個芫荽控真係好幸福，而且只要一蚊實在太實惠了！唔使5分鐘就到，啲芫荽真係鋪天蓋地，完全蓋過碗麵！真係好多！啲牛腩真係唔錯，又唔黐牙，又滷水得好好味！牛肚又係正！啲牛筋又淋又入味！如果湯底都唔錯！最難得係加埋芫荽一齊食，真係雙重享受！碗嘢只係50幾蚊，真係物超所值！

之前看完社交平台介紹這間車仔麵。今早去完灣仔教會後便在西營盤地鐵站落車來到正街的舖。叫了六個餸，有豬皮、豬紅、冬菇、咖哩魚蛋及紅腸。加了個通菜底。佢哋D通菜極之多好抵食，是我食過的車仔麵頭三位。原來好餸食就在附近。真的走保。

餐廳位處西營盤港鐵B1 出口。之前食過太子分店，覺得味道唔錯，所以再黎試一試。可惜呢一餐真係不知所謂。一入餐廳就被收銀阿姐直接安排坐最出張檯。點知之後越坐越唔對路，好似無冷氣咁。如果你間餐廳冷氣不足 好心就唔好做生意。見到有風扇諗住開，點知又係壞嘅，開唔到。叫左碗牛雜麵，碗都黎到一路食一路洗汗，全餐飯都食得好辛苦。最後食左15分鐘頂唔住，食淨半碗埋單走左。餐廳定價都唔係平，但今次體驗真係好差，呢間分店下次真係唔會再黎。

提起車仔麵，大家會諗起邊間？車仔麵其實係香港local食物，但呢幾年已經好少見，食材簡單，但不能馬虎輕視，想揾一間價錢實惠的車仔麵都很難。店舖環境乾淨，燈光光猛，門面一看已經不是走平民路線，使用電話QR code 落單，可以清晰要求少至扣底、麵質感、麵底、多汁少汁、多或少蔥芫荽等等，可以慢慢落單，亦不怕會落錯單。平日下午都有不少客人光顧，直接入座。$44 兩餸車仔 (蘿蔔，牛肚，粗麵) 配腩汁呢碗麵就算叫左扣底，份量好足，有3舊大大的蘿蔔，夠淋冇渣，牛肚亦都冇雜味，質地冧身。湯底選擇腩汁，完全唔重咸，就算飲埋湯都唔口渴。$50 新鮮魷魚鬚 香辣醬汁，反而咸咸甜甜，很開胃，魷魚爽口唔韌，誠意加配有鹽脆花生，份量唔算多。值得一提，很欣賞它的蔥芫荽新鮮！呢間車仔麵份量公道，食材新鮮乾淨，想要清淡嘅又得，想要重口味嘅又有，可以滿足客人各方面要求，配餸選擇多，座位舒服，被人感覺乾淨，會回訪！