肉骨皇 (已結業)

如果唔係住喺大坑嘅親戚提一句，都唔知道呢條街嘅盡頭有間正宗肉骨茶食。一坐低老闆已經熱烈推薦我哋嗌肉骨茶，咁既然佢間野個名叫肉骨王當然要試吓佢嘅手勢啦，一上枱開火出煙嗰一下，肉骨茶嘅味已經強烈湧入。以前從來都唔鍾意食新加坡嗰隻肉骨茶，因為胡椒味太重基本上都食唔到其他味道，反而馬來西亞嗰隻重藥材味嘅肉骨茶就非常喜歡，以呢度嘅就係馬來西亞嗰種。藥材味真係超級濃郁，一睇個顏色就知道，肉質亦都非常軟稔，所以成煲俾我哋清晒。海南雞亦都係佢令一個出名嘅菜式，其實我就唔係好鍾意食有雞皮嘅雞，不過佢軟滑嘅雞肉其實真係幾好味，我都知食海南雞吃雞皮係會畀人鬧㗎喇不過都係會照去雞皮架哈哈。呢個炒蘿蔔糕真係極度推介，醬汁甜甜地，炒到非常入味，而且一口嘅size好適合女士食，一入口即溶嘅感覺真係非常好。最後係甜品，呢個加吔焗麵包磚，個包真係冇得頂外脆內軟而且超級鬆軟，加埋少少甜既加吔真係冇得頂！不過我哋嗰日係平日去所以老細話有時間整呢個甜品，如果係星期六日去嗌嘅話可能唔會冇㗎，因為係限量嘅而且功夫非常多，所以想食嘅朋友記得早啲打去訂又或者平日先去食啦！