魯一居利寶閣宴會廳 (已結業)

突然決定去 Megabox 睇戲，未有上 openrice search 過有咩好既餐廳，去到搵左幾間食店，終於選擇左魯一居，因為之前無試過以 “山東菜” 做賣點既食店~無頭緒山東有咩名菜，所以搵左店員推介一下，包括：苿莉香薰素鵝：冷盤，有苿莉既清香，內里有些爽口既瓜菜，口感很好，好好味！魯家高湯小籠包：好多湯汁，D 湯汁很鮮甜，皮既厚度亦適中。我一向唔好小籠包，但覺得呢度既小籠包比其他出名既上海店整得好食！魯家雞豆花：燉湯，很清甜鮮味，一 D 油都無！飲落有雞和瘦肉味，雞豆花好滑，入口即融化！以上幾味菜都清甜鮮味，食後又唔口渴，應該無咩味精！清淡得黎又好味，正！另外，我地自選左兩個有興趣既菜：蔥爆羊肉 + 叉子燒餅：我地將蔥爆羊肉釀入叉子燒餅內食，味道麻麻！蔥爆羊肉唔夠鑊氣，羊肉唔新鮮；燒餅皮太厚，無香味！山東川鹵麵：麵太淰，湯底係大雜會樣樣材料有 D，味道一般！店員服務好，有禮貌，而且幾有效率。依家上 openrice 見到好多人話呢度 service 差，我覺得佢地依家有好好既改善！雖然我地自己選擇既菜味道麻麻，但店員既推介真係唔錯，都值得去試下！