Cafe Siam (The Plaza ) (已結業)

今日咁啱去中環搵個朋友，經過蘭桂坊，見到想試好耐嘅cafe siam，就一於去試吓佢嘅晚餐。貫徹蘭桂芳特色，環境比較昏暗！一坐低侍應就拎咗碟蝦片過來，好香口！Cafe siam 喺一樓上面，裝修有東南亞風格，座位亦都十分寬敞。食物方面首先我哋叫咗一個炸軟殻蟹沙律，佢嘅沙律份量都幾大而且味道清新，係一個好開胃嘅前菜。主菜方面我哋分別叫咗一個糖醋豬仔骨，甜甜酸酸咁，豬仔骨亦都炆得好入味，平時鍾意食京都骨嘅人不容錯過。之後我哋亦都叫咗一個蝦頭膏海鮮炒飯，呢個海鮮炒飯用料十足而且蝦頭膏好香，簡直係絕配。而一向鍾意食椰苗既我就叫左一個蒜香椒絲炒椰苗，佢用咗泰式嘅香料加埋蒜同椒絲，令人欲罷不能。食完咁多主菜梗係要食一食個甜品，我哋叫咗一個椰汁雪葩，椰汁味香濃而且軟滑食完一個都唔會濟。總括而言，cafe siam 好適合朋友聚會同埋約埋三兩知己一齊享受一頓豐富嘅晚餐。