麦玉子 (已結業)

今日落嚟北角做嘢，晏晝未諗到食乜，打算去「一田超市」行個圈再作決定。喺轉角位見到呢間主打地道日式厚玉子燒的「麦玉子」，店子最近喺網上相當 Hit，反正又未幫襯過，一於試下。原來除了有 6 款玉子燒之外，店鋪還有便當、麵食和烏冬等可供選擇。所有菜單都可以外賣，如果想堂食，買完可以去旁邊的 Food Court 開餐。我哋揀咗鰻魚麥飯丼 ($88)、吉列豬扒咖哩飯同兩份玉子燒。鰻魚飯用傳統日式方形漆盒盛載，飯面鋪咗鰻魚同蛋絲，分量十足。鰻魚唔算好大條，不過魚肉頗嫩滑，夠厚身，入口啖啖肉；米飯飽滿，軟糯有咬口；鰻魚汁帶微甜，但又沒蓋過魚香。吉列豬扒咖哩飯 ($65)  亦做得很有水準，豬扒嘅肉質咬落好鬆化，炸皮酥脆，入口一點也不覺油膩，就算熱氣都要食！咖哩汁係日式 feel，甜甜哋幾開胃；飯用咗珍珠米，食落彈牙掛汁，幾好味！玉子燒點咗櫻花蝦 ($35) 同明太子 ($35)，兩份玉子燒都煎得不錯，既厚身又賣相好，呈半熟，蛋汁溫潤香甜，入口嫩滑富蛋味，餡料亦足。櫻花蝦細細粒，食落帶鮮味又唔腥，令香甜的玉子燒更有口感。明太子分量亦下得甚慷慨，用料不吝嗇，入口香香辣辣，水準不俗。